Árborg er frábært sveitarfélag í örum vexti. Hér hefur verið mikil uppbygging á undanförnum árum og vöxturinn er augljós. Samkvæmt tölum frá Hagstofu Íslands var íbúafjöldi í Árborg 11.565 árið 2024, 12.064 árið 2025 og í dag eru íbúar orðnir um 13.000 talsins samkvæmt Þjóðskrá. Ný íbúðahverfi hafa risið hratt og þétting byggðar er staðreynd. Spurningin sem við þurfum að spyrja okkur er einfaldlega; hver eru næstu skref?
Fyrir mér er svarið skýrt – innviðirnir þurfa að fylgja vaxandi samfélagi. Vandinn sem fylgir auknum fólksfjölda, án þess að tækifærin vaxi á sama hraða, mun aðeins aukast ef ekkert breytist. Það er ekki nóg að byggja íbúðarhús og laða hingað fólk. Það þarf einnig að tryggja lífsgæði og lífsánægju þeirra sem velja að byggja hér upp sitt framtíðarheimili. Við viljum uppbyggingu og að fólk komi til Árborgar, en við viljum ekki síður að það velji að vera hér áfram. Það gerist eingöngu ef samfélagið þróast í takt við þarfir íbúanna.
Þetta kallar á skýra sýn og forgangsröðun. Við þurfum markvissa og framsýna áætlun um uppbyggingu innviða. Ekki aðeins á Selfossi heldur um allt sveitarfélagið, í öllum þeim byggðarkjörnum og dreifbýli sem mynda Árborg. Við þurfum að tryggja næg leikskólapláss, öflugt grunnskólastarf og gott aðgengi að framhaldsskóla. Við þurfum að byggja upp sterkt atvinnulíf sem skapar störf og dregur úr þörf fólks til að sækja vinnu út fyrir sitt nærumhverfi.
En lífsgæði felast ekki aðeins í tölum og uppbyggingu. Þau felast í daglegu lífi fólks. Lífsgæði eru fólgin í því að hafa möguleikann á að rölta um nærumhverfi sitt og fá sér sæti á bekk á grænu svæði á meðan börnin leika sér. Þau birtast líka í því að þjónusta sé til staðar þegar hennar er þörf og að geta stokkið í næstu verslun þegar gleymist að kaupa rjóma með vöfflukaffinu, svo dæmi séu tekin. Þetta gerist ekki að sjálfu sér. Þetta krefst skýrra ákvarðana, ábyrgðar og vilja til forgangsröðunar. Vöxtur sveitarfélagsins þarf að verða sjálfbær og skila sér í bættum lífsgæðum fyrir alla íbúa.
Við fjölskyldan fluttum í Árborg vegna þeirra tækifæra sem hér eru. Við búum hér áfram vegna þeirra. Nú er hins vegar kominn tími til að standa vörð um þau og byggja ofan á.
Veljum að byggja upp samfélag sem vex með fólksfjölguninni en ekki á eftir henni .
Þetta snýst nefnilega um samfélagið.
Kristín Júlía Hannesdóttir
Skipar 6. sæti hjá Framsókn í Árborg