Við hjá íþróttafélaginu Hamri skiluðum nýlega inn starfaskýrslu íþróttafélagsins Hamars fyrir árið 2025 til ÍSÍ. Það er ávallt ánægjulegt að ljúka slíkri vinnu, enda gefur hún góða yfirsýn yfir umfang og árangur starfsins á liðnu ári.
Á árinu 2025 voru 1.886 iðkendur skráðir í Hamar. Félagið starfar í átta deildum og nær til um 60% íbúa Hveragerðis miðað við fjölda. Það eitt og sér segir mikið. Það segir okkur að Hamar er lykilstoð í samfélaginu.
Margt hefur áunnist í innra starfi félagsins og árangur iðkenda hefur verið til fyrirmyndar. Þar skipta þjálfarar og sjálfboðaliðar sköpum. Það er hópur fólks sem við viljum halda í og á svo sannarlega hrós skilið fyrir óeigingjarnt og verulega lausnamiðað starf við mjög svo krefjandi aðstæður.
Við bíðum enn eftir nýju íþróttahúsi. Nú fjórum árum síðar eftir að loftborna íþróttahúsið fauk stendur blakdeildin fyrir stóru Kjörís móti í blaki í Þorlákshöfn. Fimleikadeildin hefur hætt keppnisstarfi og skortur á aðstöðu hefur kallað á miklar ferðir til Þorlákshafnar. Körfuknattleiksdeildin okkar hefur sent elstu flokkana til æfinga í Þorlákshöfn, Badmintondeildin hefur þurft að fækka æfingum og stytta þær og hluti yngri barna í knattspyrnu fær ekki tíma í húsinu yfir kaldasta tímann. Þetta hefur mikil áhrif á gæði starfsins til langs tíma. Við höfum engan íþrótta og tómstundarfulltrúa en þrátt fyrir þetta höfum við sýnt að við erum lausnamiðuð og við göngum langt til þess að láta þetta glórulausa dæmi ganga upp. Stjórnir, þjálfarar, iðkendur og foreldrar vinna saman að því að láta hlutina ganga upp.
Framundan eru kosningar og þegar við horfum til baka yfir síðustu fjögur ár vakna ýmsar spurningar:
Hvað skiptir raunverulega máli fyrir svona stórt og mikilvægt íþróttafélag?
Það er skýrt að:
- Við viljum að sett verði raunhæf áætlun í gang til næstu 10 ára í uppbyggingu íþróttaaðstöðu í Hveragerði
- Við þurfum sveitarfélag sem vill hafa íþróttastarfið í fremstu röð
- Við þurfum vilja til samstarfs
- Við þurfum stöðugar og skýrar boðleiðir
- Við þurfum einfaldari ferla – ekki flóknari
- Við þurfum sveitarfélag sem setur íþróttir í forgang
- Við þurfum skjót viðbrögð þegar vandamál koma upp
- Við þurfum stöðuga leit að umbótum
- Við þurfum að það sé hlustað á rödd íþróttafélagsins
- Við viljum að það sé einhver sem gæti okkar hagsmuna
Það sem við viljum ekki eru kosningabrögð, skammtímalausnir eða innan tóm loforð. Við viljum sveitarfélag sem er í sama liði og við.
Gangi ykkur vel!
Þorsteinn Theodór Ragnarsson
Formaður íþróttafélagsins Hamars
Guðjóna Björk Sigurðardóttir
Framkvæmdastjóri íþróttafélagsins Hamars