Hlynur Geir: Golf er fyrir alla!

Það hefur valdið mér, sem golfkennara og framkvæmdastjóra Golfklúbbs Selfoss, hugarangri hvers vegna stúlkur á öllum aldri velja sér ekki golf sem íþrótt, útivist og áhugamál.

Það vantar stúlkur í klúbbinn okkar en hlutfall kvenna í klúbbnum er allt of lítið.

Reyndar er þetta landlægt vandamál og jafnvel á heimsvísu. Golf er þess eðlis að það er einfaldlega aldrei of seint að byrja. Auðvitað hjálpar að byrja snemma, en það þarf ekki að vera vísir á að árangri. Ekki eru allir með sömu markmið í sínu golfi, sumir vilja spila golf með vinum, maka, fjölskyldu og njóta frábærar útiveru í guðsgrænni náttúrunni, skorið er aukaatriði. Aðrir þrífast á keppnum og leyfa keppnisskapinu leika lausum hala.

Ég vil með þessari grein hvetja stúlkur á öllum aldri að kynna sér golfíþróttina og upplifa hversu frábær hún er.

Við hjá Golfklúbbi Selfoss tökum vel á móti öllum konum, jafnt sem körlum, sem vilja prófa sig áfram og sjá hvort íþróttin hentar viðkomandi.

Golfklúbbur Selfoss ætlar að bjóða konum á aldrinum 25-40 ára frábært tilboð frá deginum í dag til 15. maí. Árgjald á kr. 9.900,- og fría golfkennslu fyrir þær sem eru nýliðar og einnig þær sem eru með meira en 32 í forgjöf.

Að lokum vil ég hvetja stúlkur og drengi að prófa að mæta á golfæfingar í sumar og sjá sjálf að golf er „ töff“ íþrótt og ég tala nú ekki um forvarnir gegn allskyns ósóma. Það er ekki til betri staður fyrir börn að alast upp á heldur en í golfi, þar sem ríkja reglur, mannasiðir og krakkarnir fá góðan skóla út í lífið í golfklúbbum.

Með golfkveðju, Hlynur Geir Hjartarson