Aðgengi að heilbrigðisþjónustu í heimabyggð er mikilvægur þáttur í því að skapa gæðasamfélag og auka lífsgæði íbúa. Þegar við eldumst eigum við að geta hafa þann kost, að búa í því umhverfi
sem við kjósum. Umhverfið, fjölskylda og vinir vega þar þungt. Uppbygging hjúkrunarrýma snýst nefnilega ekki bara um tölfræði eða kerfislægar ákvarðanir – valfrelsið er mikilvægt og íbúar eiga að fá þann kost að eldast með reisn þar sem ræturnar liggja.
Núverandi ríkisstjórn hefur lagt gríðarlega áherslu á uppbyggingu hjúkrunarrýma og eflingu heilbrigðiskerfisins. Þetta átak skilar sér ekki aðeins í auknum lífsgæðum fyrir eldri borgara, heldur dregur það einnig úr álagi á sjúkrahús landsins. Þegar sjúklingar komast hraðar í viðeigandi úrræði nærri sinni heimabyggð, nýtast rýmin á sjúkrahúsum landsins mun betur.
Gamli íþróttakennaraháskólinn á Laugarvatni sem áður iðaði af lífi háskólanema stendur því miður auð og hljóð og kallar á að ríkið grípi tækifærið og blási til sóknar. Laugarvatn er fullkominn staður fyrir hjúkrunarheimili og gríðarlegt hagsmunamál fyrir Suðurkjördæmið og þá sérstaklega uppsveitir Árnessýslu.
Með því að endurreisa þetta sögufræga hús og koma þar á fót hjúkrunarheimili tryggjum við íbúum sveitarfélagsins raunverulegt tækifæri til að eldast í heimabyggð. Slík uppbygging mun styrkja Bláskógabyggð og uppsveitirnar allar til muna. Hjúkrunarheimili færir byggðarlaginu verðmæt og krefjandi sérfræðistörf, sem auðgar samfélagið, skapar ný tækifæri, laðar að ungt fólk og eflir byggðafestu til framtíðar.
Að glæða lífi á ný í gamla íþróttakennaraháskólann undir starfsemi sem þessa er réttlætismál, ekki bara fyrir eldri kynslóðina heldur fyrir kjördæmið í heild.
Sandra Sigurðardóttir, þingmaður Viðreisnar Suðurkjördæmi
Víðir Reynisson, þingmaður Samfylkingarinnar Suðurkjördæmi
Ásta Lóa Þórsdóttir, þingmaður Flokks fólksins í Suðurkjördæmi