Við höldum áfram að byggja upp víðtæka þjónustu við íbúa í Sveitarfélaginu Árborg. Nýlega var ákveðið að hefja heimgreiðslur til foreldra barna til að auka valmöguleika og úrræði foreldra. Á þetta við tímann á milli fæðingarorlofs og leikskólagöngu og mun styðja foreldra við umönnun barna sem ekki eru komin með leikskólapláss eða eru í vistun hjá dagforeldri.
Þannig stíga bæjaryfirvöld enn eitt jákvætt spor að aukinni þjónustu við íbúa í okkar frábæra bæjarfélagi. Er þannig gert ráð fyrir að foreldrar barna á aldrinum 12 – 30 mánaða geti valið um heimgreiðslu að upphæð kr. 110.000,- á mánuði þar sem önnur þjónusta er ekki nýtt.
Helstu lykilpunktar:
- Upphæð heimgreiðslna er kr.110.000,- og greiðist eftirá, í fyrstu viku næsta mánaðar. Greiðslurnar teljast skattfrjálsar styrkgreiðslur.
- Heimgreiðslur eru greiddar í allt að 11 mánuði á ári, að undanskildum júlímánuði.
- Skilyrði eru m.a. að foreldrar og barn hafi sama lögheimili í Árborg, að barnið sé með gilda umsókn á leikskóla og að sveitarfélagið niðurgreiði ekki annars staðar fyrir viðkomandi barn.
- Umsóknir skulu berast rafrænt í síðasta lagi 20. dag mánaðar.
Reglur þessar tóku gildi 1. apríl 2026 og geta foreldrar sótt um heimgreiðslurnar í gegnum heimasíðu sveitarfélagsins, sjá hér. Svona styrkjum við stuðningskerfi fjölskyldna og aukum sveigjanleika foreldra á fyrstu árum barns.
Höldum áfram af ábyrgð fyrir Árborg okkar allra – þar sem þú skiptir máli.
Bragi Bjarnason
Bæjarstjóri og oddviti D-listans í Árborg