Hacking Hekla – sunnlenskt lausnamót á netinu

Hekla. sunnlenska.is/Guðmundur Karl

Hacking Hekla er nýtt lausnamót fyrir landsbyggðina sem ferðast hringinn í kringum landið og byggir ofan á verkefni sem verða til á leiðinni. Fyrsta stopp er Suðurland en þar er lausnamótið haldið í samvinnu við Samtök sunnlenskra sveitafélaga og Nordic Food in Tourism. Unnið verður með sjálfbærni í matartengdri nýsköpun og skapandi heimamenn og aðrir hvattir til að grípa tækifærið og finna lausnir sem “uppfæra” svæðið.

Lausnamót er nýsköpunarviðburður þar sem áhugasamir aðilar koma saman, deila reynslu og þekkingu og skapa lausnir við vandamálum eða áskornunum. Viðburðurinn sem vanalega tekur frá 24-48 klst er frábær leið til að efla sig í að koma góðum hugmyndum í framkvæmd og að vinna gagngert að því gera verkefni að veruleika.

Hacking Hekla varð til í gegnum doktorsverkefni Magdalenu Falter en hún er að rannsaka nýsköpun og frumkvöðlastarf í sveitum landsins. Hún fékk til liðs við sig reynslubolta úr stuðningsumhverfi frumkvöðla, hana Svövu Björk Ólafsdóttur en hún hefur meðal annars stýrt nýsköpunarkeppnum, hröðlum og fjölmörgum lausnamótum ásamt því að kenna frumkvöðlafræði og nýsköpun í háskólum og fræðslusetrum. Saman mynda þær Hacking Hekla teymið.

Auk þess að vinna að Hacking Hekla 2020 í góðu samstarfi við SASS og Nordic Food in Tourism hefur verkefnið hlotið styrk úr frumkvöðlasjóði Íslandsbanka og frá Atvinnuvega og nýsköpunarráðuneytinu. Á næsta ári er stefnan tekin á Vestfirði og Norðurland. Markmið Hacking Hekla er að draga fram í sviðsljósið öflugt frumkvöðlastarf á landsbyggðinni og tengja saman frumkvöðlasenurnar í dreifbýli og þéttbýli á Íslandi. Sömuleiðis á verkefnið að virkja skapandi hugsun og nýsköpun og eiga þátt í því að efla svæðin með stuðningi við mögulega atvinnusköpun.

Vegna aðstæðna í þjóðfélaginu og sóttvarnarreglna hefur viðburðurinn verið færður alfarið yfir á netið. Ýmsar fyrirmyndir eru fyrir því hér á landi að halda lausnamót á netinu og má þar til dæmis nefna Spjaraþon á vegum Umhverfisstofnunar og Gagnaþon sem fóru fram um daginn alfarið á netinu. Nýttir verða vettvangar eins og Zoom fyrir erindi, fyrirlestra og vinnusmiðjur fyrir þátttakendur og nýr starfrænn vettvangur sem heitir Hugmyndaþorp. Hugmyndaþorp er hugarfóstur Arnars Sigurðssonar sem er reyndur frumkvöðull og starfaði lengi hjá Blábankanum á Þingeyri. Vettvangurinn verður nýttur í hugmyndasköpun og teymismyndun og verður þróaður samhliða Hacking Hekla verkefninu. Áhugaverð erindi og fyrirlestrar ásamt opnunarviðburði og verðlaunaafhendingu verða streymdir á facebook síðu verkefnisins og því getur almenningur fylgst með þó svo að ekki sé tekið þátt í lausnamótinu.

Fyrsta Hacking Hekla fer fram dagana 16.-18. október á netinu. Fjölmargir reynslumiklir mentorar og fyrirlesarar taka þátt í lausnamótinu með því að deila reynslu og þekkingu með þátttakendum. Þema Hacking Hekla 2020 er “Í átt að sjálfbærri framtíð með matartengdri nýsköpun” og verða þátttakendur hvattir til að hugsa þemað út frá mismunandi vinklum; samgöngur, ferðaþjónusta, náttúruvernd, svæðisbundin hráefni, framleiðsla og neysla matvara. Útkoman úr lausnamótinu getur verið stafræn lausn, vara, þjónusta, verkefni, hugbúnaður, vélbúnaður eða markaðsherferð. Fyrstu verðlaun eru 150 þúsund krónur ásamt fjölda aukavinninga frá frumkvöðlum á svæðinu eins og Icelandic Lava Show, The Cave People og fleira svo eitthvað sé nefnt.

Lausnamótið er fyrir alla sem vilja hugsa í lausnum og leysa vandamál og áskoranir Suðurlands. Þátttakendur þurfa ekki að búa yfir reynslu eða hafa tekið þátt áður í lausnamóti eða öðru frumkvöðlastarfi. Allir eru velkomnir og frekari upplýsingar og dagskrá má finna á heimasíðu SASS en þar fer einnig fram skráning.