Hér í Árborg eigum við ótrúlega auðugt félagsstarf sem endurspeglast í starfsemi félaga eldri borgara á Selfossi, Eyrarbakka og Stokkseyri. Öflug félög sem halda úti fjölbreyttu starfi og mikilvægt að samfélagið styðji þau með sem bestum hætti.
Aukin lífsgæði
Með auknum lífsgæðum undanfarna áratugi eigum við raunhæfari möguleika á að halda betri heilsu þegar við eldumst. Ein af lykiláherslunum eru góðar forvarnir sem bæta bæði líkamlega og andlega heilsu. Það gefur okkur öllum aukin þrótt, möguleika til að búa sem lengst á eigin heimili og vera virkari í samfélaginu. Góðar forvarnaraðgerðir á öllum aldursskeiðum geta nefnilega skilað mikilli efnahagslegri hagræðingu til framtíðar. Þess vegna er það mjög mikilvægt að sveitarfélagið veiti eldri íbúum góða þjónustu og að hún sé markviss og skilvirk.
D-listinn í Árborg vill því vinna að:
- Áframhaldandi samstarfi við félög eldri borgara í Árborg með stuðningi og reglulegum
fundum. - Halda starfsemi “tengiráðgjafa” í verkefninu Gott að eldast.
- Auknu samstarfi ungmennaráða og skóla við félög eldri borgara.
- Efla heilsueflingu fyrir eldri borgara enn frekar.
- Ljúka við endurbætur á félagsaðstöðu í Grænumörk og byggja upp
afþreyingarmöguleika á Sýslumannstúninu á Selfossi. - Skipulagningu fjölbreyttra íbúða fyrir 60 ára og eldri á Selfossi, Eyrarbakka og
Stokkseyri.
Við sem samfélag eigum að halda vel utan um málefni eldri borgara og auka möguleika til heilsueflingar og þjónustu í nærsamfélaginu.
Bragi Bjarnason
Oddviti D-listans í Árborg