Flestir einstaklingar, fyrirtæki og nú líka stjórnsýslan eru að einhverju marki farnir að skoða möguleika gervigreindar í því skyni að auðvelda störfin. Samkvæmt nýlegri könnun Hagstofu Íslands hefur notkun gervigreindar breiðst út meðal íslenskra fyrirtækja en markviss innleiðing og stefnumótun er hins vegar ekki alltaf unnin samhliða.
Þegar stjórnsýsla, skólar og fyrirtæki taka gervigreindina í sína þjónustu þarf að undirbúa það vel annars getur farið illa. Tryggja verður hagsmuni notenda og þeirra skjólstæðinga þannig að ekki fari óvart út á opin svæði fjárhagslegar eða viðskiptalegar upplýsingar sem eiga ekki erindi fyrir almanna sjónir, svo ekki sé nú talað um persónugreinanlegar upplýsingar.
Nú hefur Grímsnes- og Grafningshreppur rutt brautina fyrir önnur sveitarfélög undir forystu Fjólu Steindóru Kristinsdóttur sveitarstjóra. Frá þessu er sagt á vef Samtaka sunnlenskra sveitarfélaga. Þar segir meðal annars: „Innleiðingin hjá sveitarfélaginu hófst á vandaðri stefnumótun þar sem lögð var áhersla á ábyrga og örugga notkun, gagnavernd og skýrar reglur fyrir starfsfólk. Sveitarfélagið mótaði gervigreindarstefnu með það að markmiði að auka skilvirkni í rekstri og gæði þjónustu á sama tíma og fyllsta öryggis er gætt í meðferð gagna. Liður í þessari vegferð var að taka upp lokaða og örugga gervigreindarlausn, „Liðsaukann“, í samstarfi við tæknifyrirtækið APRÓ. Ólíkt opnum lausnum (s.s. ChatGPT, Copilot og Gemini) er „Liðsaukinn“ hýstur í öruggu skýjaumhverfi innan Evrópu og uppfyllir kröfur GDPR, sem gerir hann viðurkenndan til vinnslu á trúnaðargögnum sveitarfélagsins, þar á meðal persónuupplýsingum og fjárhagsupplýsingum.
Í daglegu starfi er tæknin nýtt sem verkfæri til að styðja við starfsfólk frekar en að leysa það af hólmi. Hún nýtist til dæmis við að gera samantektir úr skjölum, leita í fundargerðum, greina gögn og aðstoða við gerð minnisblaða og bréfa.“
Fjóla og hennar samstarfsfólk á mikið hrós skilið fyrir að taka forystuna í að innleiða gervigreind í stjórnsýslu sveitarfélags. Þeirra vinna gerir allt auðveldara fyrir þau sveitarfélög sem á eftir koma því þeim er boðið að nýta sér þeirra þekkingu í því skyni „að spara tíma og fjármuni í stafrænni vegferð sem miðar að því sama: skilvirkari þjónustu, auknu öryggi og meiri hagkvæmni fyrir íbúa.“
Viðreisn vill að Árborg þiggi gott boð og fái að nýta reynslu Grímsnes- og Grafningshrepps við innleiðingu gervigreindar í þágu aukinnar skilvirkni í rekstri.
Ingunn Guðmundsdóttir
Skipar 5. sætið á C- lista Viðreisnar í Árborg