Nýr gervigrasvöllur á Hellu, Stracta-völlurinn, hefur staðist ítarlega úttekt óháða prófunaraðilans Sports Labs og fær FIFA Quality-vottun. Niðurstaðan staðfestir gæði vallarins og er ánægjulegur áfangi í uppbyggingu knattspyrnuaðstöðu á Hellu. Knattspyrnufélag Rangæinga, KFR, nýtir völlinn til æfinga og keppni.
Alþjóðlegar gæðakröfur staðfestar
Úttektin fór fram 24. ágúst og náði til fjölmargra þátta sem varða gæði, öryggi og leikeiginleika. Völlurinn er 105 × 68 metrar og ekkert óeðlilegt fannst við mælingar á sléttleika yfirborðsins. Engir sjónrænir gallar voru skráðir, fylliefni var jafnt dreift og mörk, búnaður og girðingar metin í góðu ástandi.
Í verksamningi var kveðið á um að gervigrasið uppfyllti kröfur FIFA Quality og völlurinn fengi vottun að lokinni úttekt. Niðurstaðan staðfestir því að þær gæðakröfur hafi verið uppfylltar.
Sports Labs hefur jafnframt upplýst að mælingarnar myndu einnig standast strangari kröfur FIFA Quality Pro Manual 2024 um leikeiginleika.
Meðal annarra valla hérlendis sem hafa hlotið FIFA Quality- eða FIFA Quality Pro-vottun eru Fylkisvöllur, Víkingsvöllur, Valsvöllur, Þróttarvöllur, KR-völlur og tveir vellir Fram í Reykjavík. Á listanum eru einnig Kópavogsvöllur, Stjörnuvöllur í Garðabæ, KA-völlur og Þórsvöllur á Akureyri, Reykjaneshöllin og annar gervigrasvöllur í Reykjanesbæ, Hásteinsvöllur í Vestmannaeyjum og gervigrasvöllurinn á Húsavík. Upptalningin nær þannig til beggja vottunarflokka.
Áframhaldandi uppbygging og hitun vallarins
Horft hefur verið til þess að Stracta-völlurinn uppfylli kröfur D-flokks samkvæmt reglugerðum KSÍ. Jafnframt er gert ráð fyrir möguleikum til frekari uppbyggingar. C-flokkur, sem miðast við 1. deild karla og efstu deild kvenna, krefst meðal annars 300 aðskildra áhorfendasæta. Vinni KFR sér sæti í deild með þeim kröfum verður aðstaðan að sjálfsögðu byggð áfram upp til samræmis.
Vegna umræðu um hitun vallarins var kallað eftir skriflegum upplýsingum frá verktaka. Samkvæmt svari hans eru fæstir vellir af þessari gerð upphitaðir. Hitun auki fyrst og fremst nýtingu yfir vetrartímann en skortur á henni hafi ekki áhrif á endingu eða gæði vallarins. Verktaki telur því ekki hættu á skemmdum af þeim sökum. Hitalagnir voru lagðar undir völlinn við framkvæmdina og hafa verið vatnstæmdar. Áfram verður unnið að lausn fyrir hitun. Heitt vatn er takmörkuð auðlind á svæðinu og fyrirhugaður er fundur með Veitum um mögulegar leiðir, meðal annars nýtingu affallsvatns.
Rangárþing ytra hefur lagt verulega fjármuni í knattspyrnuaðstöðuna. Uppbyggingin heldur áfram með nýjum varamannaskýlum og bættri búningsaðstöðu og verkefnunum verður fylgt eftir þar til þeim lýkur. Gervigrasvöllurinn hefur þegar gjörbreytt aðstöðu til æfinga og keppni og skapað betri forsendur fyrir öflugu knattspyrnustarf í Rangárvallasýslu.
Rangárþing ytra mun halda áfram uppbyggingu íþróttamannvirkja á komandi árum og er deiliskipulag fyrir nýjan frjálsíþróttavöll að fara í auglýsingu á næstu vikum. Markmiðið er að skapa börnum, ungmennum og öðrum iðkendum enn betri aðstæður og styrkja íþróttalíf í Rangárvallasýslu til framtíðar.
Eiríkur Vilhelm Sigurðarson
Sveitarstjóri Rangárþings ytra