– Varist falsspámenn. Þeir koma til yðar í sauðaklæðum, en innra eru þeir gráðugir vargar. (Matt 7, 15) –
Á laugardaginn kemur verður kosið til bæjarstjórnar hér í Svf. Árborg. Fjórir listar bjóða fram að þessu sinni, en einn var of seinn. Af þeim fjórum oddvitum listanna ber einn maður höfuð, herðar, hné og tær yfir aðra oddvita. Sá maður heitir Sigurjón Vídalín Guðmundsson, jarðfræðingur, sérfræðingur hjá Vegagerðinni og bæjarfulltrúi hér í Árborg til 8 ára. Það má Sigurjón vinur minn eiga að hann er fluggreindur, málefnalegur og umfram allt heiðarlegur í öllum sínum störfum fyrir sveitarfélagið. Það veit ég frá fyrstu hendi þar sem að við störfuðum saman í bæjarstjórn árin 2018-2022. Hann kemur alltaf til dyranna eins og hann er klæddur. Enginn úlfur í sauðagæru þó hann klæðist ósjaldan fögrum lopapeysum.
Gerir, gerir ekki
Það sem Sigurjón mun gera á komandi kjörtímabili er að standa við orðin sín og láta verkin tala líkt og hann hefur gert fram að þessu í bæjarstjórn. Það sem hann mun aftur á móti ekki gera, er að skara eld að eigin köku eða vina sinna svo sem að þrefalda laun formanns bæjaráðs ef hann kemst í þá stöðu að gegna því starfi eða að láta sveitarfélagið greiða fyrir sín persónulegu útgjöld eða vina sinna.
Sigur kostar kjark
Sést hefur til brosandi andlita í jakkafötum í sveitarfélaginu sem breyta um lögun og ímynd eftir því sem henta þykir. Andlita sem ekkert hafa fram að færa og eru bara í pólitík til að vera í pólitík og þá helst til að skammta sjálfum sér ofurlaun og klæðast nútíma sauðaklæðum.
Sigur kostar kjark, sá ég e-s staðar ritað á alþýðlegum stað. Kæru íbúar í Svf. Árborg sýnum kjark, gerum það sem þarf til að sveitarfélagið falli ekki í skaut fyrrnefndra kynjavera og fylkjum okkur öll saman að baki Sigurjóni og veitum honum glimrandi kosningu á laugardaginn. Merkjum x við S(igurjón)!
Tómas Ellert Tómasson
Verkfræðingur og fyrrverandi bæjarfulltrúi í Svf. Árborg
e.s. stuðningsgreinin er ekki rituð með aðstoð gervigreindar