Í Rangárþingi ytra erum við heppin með íþróttastarf og gæði þess. Ýmsar íþróttagreinar hafa verið iðkaðar í gegnum árin, en nokkrar þeirra mynda rauðan þráð í starfinu: hestaíþróttir hjá Geysi, knattspyrna hjá KFR og frjálsíþróttir og körfubolti hjá Ungmennafélaginu Heklu.
Undirritaður hefur hefur verið svo lánsamur að þjálfa frjálsíþróttir á svæðinu nær allan þann tíma sem hann hefur búið þar. Frá því að ég flutti á Hellu fyrir rúmum sex árum hef ég talað fyrir því að hér rísi frjálsíþróttavöllur. Í orði eru flestir sammála – enda er þetta nokkuð fjölmenn íþróttagrein með vaxandi iðkendafjölda og árangurinn eftir því.
Í samantekt sem ég tók saman sumarið 2025 kom fram að frá árinu 2016 hafa frjálsíþróttaiðkendur í Rangárþingi ytra unnið til 105 Íslandsmeistaratitla, sett sex Íslandsmet og átt átta fulltrúa í unglingalandsliðum FRÍ. Þar fyrir utan kemur fjöldi silfur- og bronsverðlauna, bikarmeistaratitlar og annar góður árangur. Þetta er árangur sem fyllir okkur stolti.
En hver er staðan í dag? Er það sama í orði og á borði?
Fyrir síðustu sveitarstjórnarkosningar sagði í stefnu Á-lista: „Skipum vinnuhóp sem gerir tillögur að tímasettri verkáætlun um framtíðarskipulag íþróttasvæða í samráði við starfandi íþróttafélög.“ Vinnuhópurinn var skipaður – en niðurstöðum hans var ekki fylgt.
Í stefnu D-lista sagði: „Vinna að uppbyggingu íþróttamannvirkja á Hellu með löglegum knattspyrnuvelli og samkeppnishæfri frjálsíþróttaaðstöðu.“ Knattspyrnuvöllurinn er kominn. Frjálsíþróttaaðstaðan er það ekki.
Þá vaknar eðlileg spurning: er markmiðið að byggja frjálsíþróttavöll sem stenst kröfur – eða á enn og aftur að láta frjálsíþróttir sætta sig við „aðstöðu“?
Málið hefur dregist á langinn. Upphaflega átti að rísa bráðabirgðaaðstaða árið 2025 og fullbúinn völlur síðar. Því var frestað til 2026. Nú er sagt að engin bráðabirgðaaðstaða verði reist og að fullbúinn völlur komi árið 2027.
Á sama tíma sýnir fjárhagsáætlun að árið 2026 eru áætlaðar 50 milljónir króna í íþróttasvæði á Hellu og síðan 5 milljónir árlega til 2029, þegar 80 milljónir eru settar inn. Það liggur í augum uppi að frjálsíþróttavöllur rís ekki fyrir slíkar fjárhæðir. Í ljósi þess að engin raunveruleg framkvæmd er hafin er afar ólíklegt að völlurinn rísi á næsta ári.
Skortur á aðstöðu er ekki bara spurning um framkvæmdir á blaði. Skorturinn hefur bein áhrif á æfingar, framfarir og möguleika barna, ungmenna og afreksfólks til að stunda sína íþrótt. Það er veruleikinn sem við stöndum frammi fyrir.
Það sem þarf er einfalt:
– Skýr og tímasett áætlun
– Raunhæf fjármögnun
– Ákvörðun um að byggja fullbúinn frjálsíþróttavöll
– Og eftirfylgni
Það er von undirritaðs að framboðin skýri afstöðu sína í þessum málum og standi við hana.
Loforð eru einföld. Framkvæmdir skipta máli.
Ástþór Jón Ragnheiðarson
Formaður Ungmennafélagsins Heklu og frjálsíþróttaþjálfari