Ég hef alltaf álitið Selfoss vera minn uppáhaldsbæ. Þrátt fyrir búsetu erlendis þar sem ég sótti nám í sjúkraþjálfun leitaði hugurinn alltaf heim og kom ekkert annað til greina en að búa á Selfossi. Í FSu hitti ég manninn minn, hér bjuggum við okkur til heimili og hér ætlum við að ala upp drengina okkar tvo.
Hreyfing hefur alltaf skipt okkur hjónin miklu máli og við vildum búa á Selfossi meðal annars þar sem hér er öflugt íþrótta-, og tómstundastarf og sáum við fram á að hér væri gott að ala börn og eldast. Í starfi mínu hef ég ítrekað séð þau góðu áhrif sem reglubundin hreyfing hefur á lífsgæði fólks og því tel ég mikilvægt er að styðja áfram vel við það fjölbreytta og góða starf sem er hér á Selfossi þar sem í því felst mikilvæg forvörn. Bæði þarf að halda áfram að huga vel að börnum og ungmennum en einnig þarf að styðja vel við forvarnir fyrir eldri borgara. Í því felst meðal annars að gera aðgengi að hreyfingu auðveldara fyrir þennan hóp og er fyrirtaksstarf sem dæmi í Kappahl-höllinni en einnig í Grænumörk. Forvarnir fyrir þennan hóp snúa bæði að almennu líkamlegu og andlegu heilbrigði en einnig að því að minnka félagslega einangrun, sem er vaxandi vandamál í samfélaginu almennt.
Alltaf er hægt að gera gott betra og hægt væri að styðja lýðheilsu þessa fólks ennfrekar með t.d. fleiri gönguleiðum utandyra, gera fleiri græn svæði og nýta þau sem dæmi fyrir æfingatæki eða íþróttir eins og mini-golf eða boccia svo dæmi séu tekin. Ef vel er staðið að uppbyggingu grænu svæðanna gætu þau jafnvel orðið að fjölskyldusamverustöðum þar sem allir aldurshópar geta tekið þátt og notið.
Kristín Júlía Hannesdóttir
Skipar 6. sætið á lista Framsóknar í Árborg