Því er stundum haldið fram að eitt kjörtímabil sé stuttur tími en staðreyndin er sú að í lífi fólks gerist margt og breytist á fjórum árum. Barn sem kláraði leikskóla fyrir fjórum árum er nú á leið í fimmta bekk og fyrir það barn er fjögurra ára bið eftir breytingum stór hluti af æskunni.
Í nútímasamfélagi þróast hlutir á veldishraða. Við erum sítengd, bæði hvort öðru og umheiminum, og vön því að hlutir gerist hratt. Breytingar á vinnubrögðum, væntingum og samskiptum sem áður tóku mörg ár, gerast nú á einu kjörtímabili. Tæknin breytir því hvernig við vinnum, hvernig við fáum þjónustu og hvernig við tökum þátt í samfélaginu. Sem dæmi var gervigreind, sem í dag er hluti af daglegu lífi fólks, fjarstæðukennd hugmynd við upphaf núverandi kjörtímabils.
Fjögur ár eru því langur tími í lífi íbúa og því er óásættanlegt að mál sem hafa verið sett í forgang eða lofuð skili sér ekki í raunverulegri framkvæmd innan þess tíma.
Framtíðarsýn og framkvæmd
Í sveitarstjórnarmálum dugar skýr framtíðarsýn skammt ef ekki fylgir þor til að framkvæma og skýrir ferlar til að vinna eftir. Það hvernig sveitarfélagið vinnur skiptir máli og hefur úrslitaáhrif á gæði þeirra þjónustu sem veitt er íbúum. Þegar ákvarðanir hafa verið teknar þarf að sjá til þess málum sé komið í framkvæmd fljótt og örugglega án þess að gæðum sé fórnað.
Vinna þarf markvisst að því að gera sveitarfélagið að öflugum vinnustað. Það felst meðal annars í því að bæta starfsumhverfi, skýra verkferla, nýta betur fagþekkingu starfsmanna og innleiða tæknilausnir. Þetta eru atriði sem skila sér í bættri þjónustu og hraðari afgreiðslu fyrir íbúa. Auk þess tryggja þau að ákvarðanir sem teknar eru verði að veruleika og án óþarfa tafa.
Þegar tíminn líður án niðurstöðu
Það er mikilvægt að kjörnir fulltrúar geti brugðist hratt við til að tryggja framþróun sveitarfélagsins í takt við hraða samfélagsins. Við höfum ekki alltaf svigrúm til þess að setja lausnir til hliðar í leit að stærri eða fullkomnari niðurstöðu því þá líður tíminn án raunverulegra framfara. Samfélagið í dag krefst þess að við séum í stöðugri þróun þar sem verkin vinnast hratt og vel.
Fyrir síðustu kosningar snerist umræðan að miklu leyti um uppbyggingu íþróttaaðstöðu eftir fall Hamarshallarinnar og voru íþróttamálin í raun eitt stærsta kosningamálið. Metnaðurinn var mikill og hugmyndirnar stórar en fjórum árum síðar er enn engin aðstaða komin í notkun, aðstaða sem átti að vera klár í lok árs 2022. Verkefnið mjakast áfram en tíminn líður og fyrir íbúa er biðin orðin of löng.
Það er ekki nóg að tala um framtíðarsýn ef framkvæmdin skilar sér ekki. Fjögur ár eru ekki stuttur tími og íbúar eiga að sjá raunverulegar breytingar innan þess tíma. Það kallar á skýr vinnubrögð, skýra forgangsröðun og fyrst og fremst heiðarleg skilaboð til íbúa varðandi hvað er raunhæft að gera.
Ingimar Guðmundsson
Oddviti D-listans í Hveragerði