Lykillinn að farsæld barna snýst um að börn búi við aðstæður sem styðja við þroska þeirra, líkamlega, andlega og félagslega. Við Þurfum að skapa aðstæður þar sem börn eru örugg, fá stuðning eftir þörfum og hafi jöfn tækifæri til að vaxa og dafna. Farsæld felur í sér að horft sé heildstætt á barnið og að tekið sé mið af aðstæðum þess heima, í skóla og í frítíma, en farsæld skiptir máli þar sem hún er mikilvæg forvörn sem leggur grunn að heilsu og þátttöku til framtíðar.
Markmiðið er að þjónustan sé samfelld, aðgengileg og auðveld í notkun og veitt á þeim tíma sem barnið þarf á henni að halda. Fjölskyldur eiga ekki að þurfa að flakka á milli marga þjónustukerfa.
Skýr sýn og markvissar aðgerðir
Okkur í D-listanum í Hveragerði er umhugað um börn og fjölskyldur. Við ætlum að stuðla að aukinni farsæld barna. Það gerum við með því að móta ábyrga stefnu, skýr markmið og fara í raunhæfar aðgerðir. Fyrsta skrefið er að vita hvar við stöndum. Við viljum meta reglulega stöðu í málefnum barna og ungmenna og nýta niðurstöður markvisst til umbóta. Þannig tryggjum við að þjónustan þróist í takt við þarfir barnanna. Við viljum jafnframt að sveitarfélagið verði leiðandi í því að vinna í anda farsældarlaganna. Þar skiptir snemmtæk íhlutun sköpum en með því að efla sérkennslu og grípa fyrr inn í styðjum við börn áður en vandi vex og áskoranir verða stærri og flóknari. Við í D-listanum viljum gera samstarf skóla, félags- og heilbrigðisþjónustu skýrara og markvissara. Við viljum jafnframt taka skref fram á við í þjónustu við fötluð börn með því að tryggja betra aðgengi að úrræðum í nærumhverfi þeirra og jafna þátttöku þeirra í samfélaginu.
Það skiptir máli að hlusta
Lykilatriði í þessari vinnu er að hlusta. Raddir barna og fjölskyldna þurfa að fá raunverulegt vægi þegar kemur að þeirra eigin lífi. Það ætlum við að gera með því að skapa vettvang þar sem börn og foreldrar geta komið sjónarmiðum sínum á framfæri og haft raunveruleg áhrif á þjónustuna.
Lagasetning ein og sér tryggir ekki farsæld barna. Við sem vinnum í kerfinu og stjórnsýslunni þurfum að láta kerfið virka fyrir börnin og fjölskyldur þeirra. Við gerum það með því að stuðla að opnu samtali á milli kerfa, samræma verkferla og hafa skýra ábyrgð. Farsæld barna er sameiginleg ábyrgð okkar allra. Með skýrri sýn getum við gert Hveragerði að leiðandi sveitarfélagi þar sem öll börn fá tækifæri til að blómstra.
Við á D-listanum teljum að farsæld barna eigi ekki að vera aukaatriði, heldur grunnstoð í uppbyggingu samfélagsins. Það er ekki bara skylda okkar heldur fjárfesting til framtíðar.
Hekla Björt Birkisdóttir
Skipar 8. sæti D-listans í Hveragerði
Guðfinna Ýr Sumarliðadóttir
Skipar 10. sæti D-listans í Hveragerði