Fræðsla, samtal og forvarnir um rafknúin ökutæki
Fræðslu- og samtalskvöld um rafknúin ökutæki var nýverið haldið í félagsmiðstöðinni Zelsíuz þar sem foreldrum, börnum og ungmennum var boðið að koma saman til samtals um öryggi, ábyrgð og þær reglur sem gilda um notkun slíkra tækja.
Undanfarið hefur notkun barna og ungmenna á rafknúnum ökutækjum aukist verulega og tækin orðið fjölbreyttari, meðal annars rafmagnshlaupahjól, létt bifhjól, krossarar og fjórhjól. Samhliða þessari þróun hafa áhyggjur aukist, bæði vegna aksturs án tilskilinna réttinda og vegna slysa sem þegar hafa orðið.
Samráðshópur um rafknúin ökutæki
Í vor var sett á fót sérstakt samstarfsverkefni og samráðshópur um notkun barna og ungmenna á rafknúnum ökutækjum. Hópurinn er skipaður fulltrúum frá lögreglu, barnavernd og frístundaþjónustu Árborgar og vinnur að því að efla öryggi barna og ungmenna með fræðslu, snemmtækri íhlutun og samræmdum viðbrögðum.
Verkefnið byggir á þeirri megináherslu að nálgast málefnið fyrst og fremst út frá forvörnum, fræðslu og samtali við fjölskyldur með það að markmiði að draga úr áhættuhegðun og koma í veg fyrir slys áður en alvarleg atvik eiga sér stað.
Á fundinum var farið yfir helstu lög og reglur sem gilda um þessi ökutæki, meðal annars aldurstakmörk, ökuréttindi, hjálmaskyldu og hvar heimilt er að aka. Einnig var rætt um mikilvægi samtals milli foreldra og barna og sameiginlega ábyrgð samfélagsins þegar kemur að öryggi barna í umferðinni.
Við þökkum öllum sem mættu og tóku þátt í góðum og uppbyggilegum umræðum.
Foreldrar og forsjáraðilar eru hvattir til að kynna sér vel þær reglur sem gilda um rafknúin ökutæki, meðal annars hjá Samgöngustofu, Lögreglunni og í umferðarlögum. Mikilvægt er einnig að kynna sér vel hvaða tæki börn og ungmenni eru að nota, hvaða hraða þau ná og hvort þau krefjist aldurs eða ökuréttinda.
Öryggi barna í umferðinni er sameiginlegt ábyrgðarverkefni okkar allra.