Birta starfsendurhæfing, Virk og Vinnumálastofnun hafa innleitt sérhæft úrræði sem felst í því að tengja saman atvinnurekendur og einstaklinga sem leita að starfi á almennum vinnumarkaði. Unnið er eftir hugmyndafræði IPS (Individual placement and support) um að veita ungu fólki í viðkvæmri stöðu sérstakan einstaklingsmiðaðan stuðning við starfsleit með það að markmiði að fyrirbyggja ótímabært brotthvarf af almennum vinnumarkaði og auka atvinnuþátttöku þeirra.
Atvinnulífstenglar Virk, Birtu og Vinnumálastofnunar hafa það hlutverk að veita aðstoð og ráðgjöf við markvissa leit að störfum og halda utan um samskipti við atvinnurekendur og atvinnuleitendur gegnum ráðningarferlið, auk eftirfylgni við aðlögun í starf. Til að auka samvinnu milli stofnana varðandi verkefnið hefur verið sett á stofn IPS teymi Suðurlands sem fundar reglulega. Ávinningur atvinnurekenda af samstarfinu er margvíslegur og má til dæmis nefna aukna fjölbreytni í starfsmannahópnum og jákvæð áhrif á ímynd fyrirtækis eða stofnunar.
Það er mikilvægt fyrir velferð ungs fólks að fá tækifæri til þátttöku á vinnumarkaði. Það að hafa vinnu gefur tilfinningu fyrir tilgangi og lífsfyllingu, hefur jákvæð áhrif á andlega líðan og þjálfar einstaklinga í að takast á við ýmis verkefni lífsins. Að hafa vinnu getur hjálpað til við að styrkja jákvæða sjálfsmynd og sjálfsvirðingu.
Við viljum gjarnan fá fyrirtæki og stofnanir á svæðinu til liðs við okkur til að styðja við ungt fólk og hvetjum atvinnurekendur til að hafa samband til að fá frekari upplýsingar. Hægt er að óska eftir heimsókn á vinnustaðinn eða símtali til að fá frekari kynningu á verkefninu. Einnig er velkomið að hafa samband í tölvupósti á eftirfarandi netföng: ips@vmst.is, birta@birtastarfs.is, hildur@virk.is.
Kristín Arna Hauksdóttir
Vinnumálastofnun á Suðurlandi
Íris Ásgeirsdóttir
Vinnumálastofnun á Suðurlandi
Hildur Gestsdóttir
Virk á Suðurlandi
Margrét Anna Guðmundsdóttir
Birta Starfsendurhæfing Suðurlands
Sandra Guðmundsdóttir
Birta Starfsendurhæfing Suðurlands