Það hefur verið ánægjulegt að stíga aftur inn í bæjarpólitíkina eftir langan tíma, eða frá því ég sat í bæjarstjórn Hveragerðis á árunum 2002 til 2006. Það hefur gefið mér mikinn drifkraft að taka þátt í þeirri kosningabaráttu sem nú er á lokametrunum.
Í þeim fjölmörgu samtölum sem við höfum átt við bæjarbúa hefur eitt orðið æ skýrara, það er mikill vilji til breytinga og margt má gera betur hér í Hveragerði.
Ég hef reglulega verið spurður hvers vegna ég tók ekki sæti ofar á listanum. Svarið er einfalt. Á listanum er öflugt, reynslumikið og ábyrgt fólk sem ég treysti til að standa sig vel og vinna af heilindum fyrir bæjarbúa.
En hin ástæðan er jafn mikilvæg. Hún er sú sama og varð til þess að ég ákvað að blanda mér aftur í sveitarstjórnarmálin. Ég vil sjá breytingar í Hveragerði og ég vil leggja mitt af mörkum til að þær verði að veruleika.
Við á D-listanum höfum lagt fram skýra stefnu um hvernig við ætlum að koma þeim breytingum í framkvæmd. Við ætlum ekki aðeins að tala um hlutina. Við ætlum að fylgja málum eftir, taka ábyrgð og leiða sveitarfélagið áfram inn í framtíðina.
Fram undan eru mikilvægar kosningar. Þá skiptir máli að velja fólk sem er tilbúið til að axla ábyrgð, taka ákvarðanir og koma hlutunum í verk. D-listinn er raunverulegur valkostur fyrir þá sem vilja breytingar í Hveragerði.
Þess vegna sit ég í 4. sæti D-listans — tilbúinn að taka til hendinni.
Með góðum stuðningi getum við komið þeim fjölmörgu verkefnum í framkvæmd sem Hveragerði þarf á að halda.
Hjalti Helgason
4. sæti D-lista í Hveragerði