„Eflum Hrunamannahrepp“ var slagorð D-lista sjálfstæðismanna og óháðra fyrir síðustu kosningar. Strax í upphafi kjörtímabilsins höfðum við samband við Aldísi Hafsteinsdóttur sem tók vel í verkefnið og gekk til liðs við okkur. Um var að ræða pólitíska ráðningu og því ekki hefðbundið auglýsingaferli. Aldís kom inn með krafti, hafði mikla trú á stefnu listans og fylgdi ákvörðunum vel eftir af fagmennsku og árangri.
Hrunamannahreppur hafði svo sannarlega tækifærin — og við nýttum þau. Við skipulögðum lóðir, mættum aukinni eftirspurn, áttum gott samtal við íbúa og fjárfesta og höfðum trú á verkefninu. Sveitarfélagið hefur vaxið gríðarlega og þrátt fyrir um 1.800 milljóna króna fjárfestingu á kjörtímabilinu hefur reksturinn líklega aldrei verið sterkari.
Með fjölgun íbúa og fasteigna hefur rekstrargrundvöllur sveitarfélagsins styrkst og þannig skapast svigrúm til að bjóða enn betri þjónustu. Margt hefur áunnist á undanförnum árum; innviðir hafa verið efldir, aðstaða starfsfólks batnað, nýframkvæmdir verið umfangsmiklar og þjónustustig tekið stakkaskiptum.
Það er virkilega ánægjulegt að sjá fjárfestingu halda áfram að raungerast víðs vegar um sveitarfélagið, bæði í íbúðabyggð og atvinnulífi. Uppbyggingin eflir samfélagið og tryggir farsæla framtíð Hrunamannahrepps.
Fersk sýn og ábyrg fjármál
D-listi sjálfstæðismanna og óháðra hefur endurnýjast að hluta og með nýju fólki kemur fersk sýn á framtíð sveitarfélagsins. Á listanum er fólk með sterkar tengingar við fjölbreyttar atvinnugreinar í sveitarfélaginu og við viljum leggja okkar af mörkum til að halda áfram að leiða Hrunamannahrepp inn í framtíðina.
Við ætlum áfram að sýna aðhald í rekstri og hagræða þar sem kostur er. Við munum stilla gjaldskrám í hóf og halda áfram að lækka álagningarprósentu fasteignagjalda. Íbúum af erlendum uppruna fjölgar og því er mikilvægt að efla þátttöku þeirra og tengsl við samfélagið. Við viljum stofna nýtt íbúaráð sem stuðlar að aukinni samvinnu og þátttöku allra íbúa.
Við viljum einnig að Hrunamannahreppur verði enn eftirsóknarverðari kostur fyrir fyrirtæki. Með skýru skipulagi, lágum álögum, skilvirkri stjórnsýslu og jákvæðu viðmóti getum við áfram skapað umhverfi þar sem hugmyndir verða að veruleika.
Skýr framtíðarsýn fyrir sveitarfélagið
Skýr framtíðarsýn er lykilatriði. Strax í byrjun næsta kjörtímabils viljum við hefja endurskoðun aðalskipulags í góðu samráði við íbúa.
Við leggjum sérstaka áherslu á þéttbýlið á Flúðum sem hefur vaxið hratt undanfarin ár. Við viljum fegra opin græn svæði og gera þau aðgengilegri og notendavænni. Lækjargarðurinn og Kvenfélagsskógurinn eru hjarta þéttbýlisins og mikilvægt er að fjárfesta í þessum svæðum til leikja, útivistar og samfélagslegra samskipta.
Áfram þarf að viðhalda innviðum sveitarfélagsins. Við verðum að tryggja öruggt neysluvatn og klára lagningu Blákvíslarveitu.
Öflugt samfélag og sterk þjónusta
Líflegt samfélag byggir á þátttöku íbúa. Frístundastarf er lykilþáttur í lífsgæðum, tengslamyndun og vellíðan. Við ætlum áfram að styðja og styrkja það starf.
Frístundastyrkir barna verða hækkaðir og við viljum einnig koma á frístundastyrkjum fyrir íbúa 67 ára og eldri.
Við munum áfram fjárfesta í starfsumhverfi skólanna, meðal annars með byggingu nýs húsnæðis sem tengir skólana saman. Einnig viljum við efla fjölbreytni í kennslu og fjárfesta í aðstöðu til útikennslu.
Menningarlíf og samfélagsandi í Hrunamannahreppi eru sterk og við viljum áfram styðja við það af metnaði. Mikilvægt er að viðhalda þeim krafti sem býr í félagsstarfinu og taka vel á móti nýjum íbúum.
Höldum áfram á sömu braut
Við á D-lista sjálfstæðismanna og óháðra í Hrunamannahreppi höfum þroskast mikið á síðustu átta árum og lært margt á liðnu kjörtímabili. Nú stöndum við enn sterkari og betur undirbúin til að takast á við næstu verkefni.
Við þökkum það traust sem okkur var sýnt fyrir fjórum árum og óskum eftir stuðningi þínum laugardaginn 16. maí.
Þetta snýst um fólk og málefni. Setjum X við D og höldum áfram á sömu braut — og gerum
samfélagið okkar enn sterkara.
ÁFRAM GAKK!
Undirrituð skipa efstu þrjú sætin á D-lista Sjálfstæðismanna og óháðra í Hrunamannahreppi
Jón Bjarnason
Bjarney Vignisdóttir
Ragnar Lúðvík Jónsson