Ég flutti í samfélagið í Grímsnes- og Grafningshreppi fyrir rúmum tíu árum, á uppvaxtarbæ eiginkonu minnar í Grafningi. Lífið í þessum hluta hreppsins er einhvern veginn hægara en hinum megin Sogsins, sem skapar einstaka ró og lífsgæði. Þó að við stöndum stundum utan við hringiðu uppbyggingar og erils nágranna okkar handan Sogsins felast í því jafnframt dýrmæt tækifæri til að varðveita sérstöðu svæðisins og styrkja samhug íbúa. Grafningur einkennist af stórum bújörðum og víðfeðmu dreifbýli sem býr yfir miklum möguleikum til áframhaldandi þróunar og nýsköpunar.
Staða landbúnaðar og búskapar
Betri stuðningur við bændur og aðra sem vilja stunda búskap er lykilatriði, enda er landbúnaður undirstaða byggðar, atvinnu og menningar í héraðinu. Með markvissum aðgerðum og auknum skilningi stjórnvalda má efla greinina enn frekar og tryggja að hún dafni til framtíðar. Einföldun regluverks og aukinn stuðningur sem tekur mið af sérstöðu og áskorunum dreifðra byggða getur skapað betri rekstrarskilyrði og hvatt til nýliðunar í landbúnaði.
Sérstaklega er mikilvægt að tryggja bændum, sem og öðrum íbúum, gott aðgengi að nauðsynlegri innviðaþjónustu, svo sem öruggum samgöngum, áreiðanlegum veitum og skýru skipulagi. Úrbætur í veitumálum eru þar í forgrunni, sérstaklega á köldum svæðum, og felast í þeim tækifæri til að nýta umhverfisvænar orkulausnir. Með því að styðja íbúa við innleiðingu nútímalegra og sjálfbærra orkugjafa getur samfélagið orðið leiðandi í grænum lausnum og byggt upp framsækna framtíðarsýn sem styrkir bæði atvinnulíf og umhverfi.
Tillit til íbúa
Með auknu samráði og virku samtali við íbúa í dreifbýlinu er hægt að byggja upp enn sterkara og réttlátara samfélag. Íbúar búa yfir dýrmætri þekkingu og reynslu sem mikilvægt er að nýta við ákvarðanatöku sveitarfélagsins. Með því að tryggja að sjónarmið þeirra fái vægi og að þeir sitji við sama borð og íbúar þéttbýlis, þegar kemur að forgangsröðun verkefna og úthlutun fjármagns, má efla traust og samheldni innan sveitarfélagsins.
Slíkt samstarf skapar grundvöll að sameiginlegri framtíðarsýn þar sem styrkleikar allra svæða fá að njóta sín. Með samstilltu átaki er hægt að efla þjónustu, styrkja innviði og auka lífsgæði íbúa, þannig að Grafningurinn og Grímsnesið verði áfram eftirsóknarverðir staðir til búsetu, atvinnu og uppbyggingar.
Samgöngu- og umferðarmál
Samgöngu- og umferðarmál eru mér sérstaklega hugleikin, ekki síst í Grafningi. Neðri Grafningur hefur því miður dottið út af vegaáætlun, sem kallar á tafarlausar úrbætur. Mikilvægt er að beita sér fyrir betra og markvissara vegaviðhaldi ásamt auknu umferðaröryggi til að tryggja öryggi allra vegfarenda.
Á undanförnum árum hefur umferð um svæðið aukist verulega, meðal annars vegna fjölgunar ferðamanna sem ferðast um þrönga og viðkvæma vegi þess. Þetta getur skapað hættu fyrir bæði íbúa og gesti. Vegurinn er víða aðeins um eina og hálfa akreinarbreidd og afar þröngur, auk þess sem töluverð umferð malarflutningabifreiða eykur álag og slysahættu.
Með markvissum úrbótum, svo sem bættri vegagerð, reglulegu viðhaldi, skýrari merkingum og aðgerðum til að auka öryggi, er hægt að skapa öruggari og skilvirkari samgöngur. Slíkar framkvæmdir myndu ekki aðeins bæta lífsgæði íbúa heldur einnig styðja við sjálfbæra þróun ferðaþjónustu og atvinnulífs á svæðinu.
Þess vegna býð ég mig fram fyrir Betri sveit – fyrir okkur öll.
Friðrik Guðmundsson
Skipar 3. Sætið á Ö-lista í Grímsnes- og Grafningshreppi