Bæjarmálafélagið Áfram Árborg býður ekki fram fyrir sveitarstjórnarkosningar árið 2026.
Félagið var stofnað árið 2018 af Pírötum, Viðreisn og óháðum og náði inn einum manni í sveitarstjórnarkosningunum 2018. Þá unnum við með Samfylkingunni, Framsóknarflokk og Miðflokki í meirihluta allt kjörtímabilið. Við náðum aftur inn manni í kosningunum 2022 og höfum verið í meirihlutasamstarfi með Sjálfstæðisflokknum frá því í júní 2024.
Það hefur hvergi skugga á borið í samstarfinu með Sjálfstæðisflokknum og viljum við sérstaklega þakka þeim fyrir gott samstarf.
Félagið hefur frá upphafi haft á stefnuskrá sinni virkt íbúalýðræði, vönduð vinnubrögð, gagnsæi og betri upplýsingar með opnari stjórnsýslu, fjárhagslega sjálfbærni og ábyrga meðferð skattfés. Við höfum lagt áherslu á málefni fjölskyldna og lagt okkur sérstaklega eftir að hlusta á ungt fólk í gegnum Ungmennaráð, eldra fólk í gegnum Öldungaráð og málefni minni byggðakjarna í gegnum hverfisráð. Við höfum beitt okkur sérstaklega í skipulagsmálum, skólphreinsun, mennta- og menningarmálum og verið virk í umhverfismálum.
Við höfum náð árangri og horfum um öxl með stolti á tíma okkar of áhrif í bæjarstjórn. Bættur fjárhagur eftir erfiða vaxtaverki, nýtt aðalskipulag, betri áætlanagerð og verklag. Þá er blómstrandi menning og listir um allt sveitarfélagið, umbætur í skólastarfi, m.a. stofnaður Hjallastefnuleikskóli. Ný hreinsistöð er að verða tilbúin sem og Stekkjaskóli, Selfosshöllin var byggð og opið bókhald er komið á vefsíðu sveitarstjórnar. Uppbygging innviða eftir ótrúlega íbúafjölgun í sveitarfélaginu hefur sjaldan eða aldrei verið meiri en á þessu kjörtímabili, ekki síst fjárfestingar í orkuöflun. umbætur í velferðar- og aðgengismálum,regluleg upplýsingagjöf og betri tölfræði. Við höfum haldið íbúum upplýstum með íbúafundum um ýmis málefni og tryggt að farið var eftir vilja íbúa í íbúakosningum. Við getum tínt fleira til en látum þetta nægja.
Við viljum þakka íbúum Árborgar kærlega fyrir traustið sem okkur hefur verið sýnt frá árinu 2018. Við viljum einnig þakka samstarfsfólki í bæjarstjórn, nefndum og ráðum á vegum bæjarstjórnar og starfsfólki sveitarfélagsins fyrir gott samstarf. Við þökkum Viðreisn kærlega fyrir samstarfið í Áfram Árborg undanfarin 8 ár og óskum þeim velfarnaðar í komandi kosningum.
F.h. Bæjarmálafélagsins Áfram Árborgar,
Álfheiður Eymarsdóttir
Bæjarfulltrúi Á lista, varaformaður bæjarráðs og varaformaður eigna- og veitunefndar