Nú eru sveitastjórnarkosningar um næstu helgi. Ég dáist af þeim einstaklingum sem bjóða sig fram til sveitastjórnar – fólkið sem er tilbúið til að leggja sig fram og vinna fyrir okkur íbúana. Þeir þora að láta skoðanir sínar í ljós og eru opnir fyrir gagnrýni frá öðrum. Það er ekki sjálfgefið að fólk sé tilbúið að gefa sig allan í þessi störf, svo við verðum að virða þá sem bjóða sig fram og gagnrýna þau á jákvæðan og uppbyggilegan hátt, frekar en að níða þau niður.
Ég hef tekið þátt í sveitarstjórnarmálum sl. 8 ár, verið varamaður í sveitarstjórn og setið sveitarstjórnarfundi ásamt því að vera nefndarmaður og formaður nefndar. Hafa þessi ár verið mjög lærdómsrík og skemmtileg. Einnig hefur þetta verið góð leið til að hafa áhrif á hvernig sveitarfélagið okkar hefur þróast og koma mínum sjónarmiðum varðandi lýðheilsu- og æskulýðsmál á framfæri. Einna vænst þykir mér um verkefnið heilsueflandi samfélag sem gerir Hrunamannahrepp enn eftirsóknarverðari. Það er mikilvægur lærdómur sem íbúi að sjá hvernig kerfið okkar virkar og vita hvernig málin ganga fyrir sig.
Fyrir 8 árum ákváðum við nokkur að stofna D-lista Sjálfstæðismanna og óháðra í Hrunamannahreppi. Vinnan og undirbúningurinn hófst heima hjá mér, við eldhúsborðið í Hvammi, þar sem við ræddum hvernig við sæjum sveitarfélagið fyrir okkur og hvernig við vildum sjá það blómstra og dafna. Þar kom fram fjölbreytni hugmynda og skoðana, og alltaf var rætt af virðingu um menn og málefni og það sem einkenndi hópinn okkar svo sterkt og hefur gert alla tíð var trúin. Að þora að hugsa djarft og leyfa sér að hugsa stórt. Það leikur ekki vafi á því í mínum huga að D-listinn átti fullt erindi inn í sveitarstjórnarpólitíkina og í sannleika sagt hefur gjörbreytt, í samvinnu við íbúa, Hrunamannahreppi til batnaðar.
Eitt af því sem mér hefur fundist einkenna sveitarstjórnina og nefndarmennina sem ég hef starfað með, er virðing fyrir skoðunum. Fólk er tilbúið að hlusta og þorir að segja sína skoðun. Ég hef upplifað þetta sérstaklega þegar ég hef setið sveitarstjórnafundi undir stjórn Jóns Bjarnasonar og fylgst með hans störfum. Jón hefur sýnt sl. 8 ár að hann á vel heima í sveitarstjórnarmálum, þorir að taka af skarið, kynnir sér málin til hlítar, og heyrir óspart í fólki til að finna góðar lausnir. Hann er einn af þeim sem er alltaf búinn að hugsa næsta leik og sem dæmi á hann stærsta þáttinn í ráðningu Aldísar Hafsteinsdóttur sem var pólitísk og tekin af kjark og skýrri sýn á það hvert við vildum stefna. Þetta eru góðir eiginleikar leiðtoga og vona ég að kjósendur vilji áfram halda D-listanum við stjórnartaumana. Ég er stolt af því að hafa unnið með þessum frábæra hópi sl. 8 ár.
Núna er D-listi sjálfstæðismanna og óháðra vel mannaður. Á listanum sitja duglegir og klárir einstaklingar með mismunandi þekkingu og eiginleika sem nýtast vel, ég mun styðja þau áfram til að leiða Hrunamannahrepp á næstu árum.
Höldum áfram og gerum samfélagið enn sterkara í Hrunamannahreppi.
Sigfríð Lárusdóttir
Formaður Lýðheilsu- og æskulýðsnefndar og fyrrum frambjóðandi á D-lista