Ég heiti Matthías Bjarnason og í dag, þegar þessi grein birtist, fagna ég 26 ára afmæli mínu. Á slíkum tímamótum er við hæfi að ég kynni mig fyrir þeim sem ég bið um traust hjá, ykkur, kæru íbúar Árborgar.
Ég er sonur Bjarna Birgissonar, hestamanns og yfirmatreiðslumanns á Heilbrigðisstofnun Suðurlands, og Láru Bergljótar Jónsdóttur, skólastjóra í Reykholtsskóla í Bláskógabyggð. Þau búa á Blesastöðum 2a á Skeiðum og þar á ég rætur mínar að rekja. Systkini mín eru Gunnlaugur Bjarnason, reiðkennari og hestamaður, búsettur í Noregi og Lára Bjarnadóttir, leiðbeinandi og kennaranemi.
Fjölskyldusaga mín er nátengd svæðinu. Föðurafi minn er Birgir Hartmannsson á Selfossi, vísnasmiður og harmonikkuleikari, en jafnframt fyrrum bóndi og fangavörður. Föðuramma mín, Lára Bjarnadóttir, starfaði á hjúkrunarheimili en hún er fallin frá. Þau bjuggu lengi á Litla-Ármóti og síðar í Lindarbæ. Móðurafi minn er Jón Gunnlaugsson, fyrrum landpóstur og rútubílstjóri, af mörgum þekktur sem Jón póstur. Móðuramma mín er Helga Guðrún Guðmundsdóttir, sem lengi var gjaldkeri í Landsbankanum á Selfossi. Þau byggðu sér hús við Fossheiði og búa þar enn.
Þetta er fólkið mitt. Vinnusamt fólk sem hefur þjónað samfélaginu sínu og einna helst kennt mér að gildi felast í verkum frekar en orðum.
Sjálfur starfa ég sjálfstætt, sem tæknimaður og lauk BA-prófi í opinberri stjórnsýslu frá Háskólanum á Bifröst árið 2025. Frá unga aldri hafa samfélagsmál átt hug minn allan. Ég settist í sveitarstjórn Skeiða- og Gnúpverjahrepps árið 2018, þá aðeins 18 ára gamall og sat þar í fjögur ár. Ég gekk í Framsókn og eftir að ég flutti á Selfoss árið 2022 tók ég sæti á lista flokksins í Árborg. Síðan þá hef ég setið í skipulagsnefnd og verið varabæjarfulltrúi.
Sambýliskona mín heitir Daníela Stefánsdóttir og saman eigum við tvo drengi, Stefán Atlas, fæddan í september 2024, og ónefndan dreng, fæddan í mars 2026.
Nú býð ég mig fram til að starfa fyrir ykkur, sem oddviti Framsóknar í Árborg. Þetta er stór ákvörðun, tekin af alvöru og virðingu fyrir því trausti sem fylgir hlutverkinu. Sumir telja þessa ákvörðun mína kannski djarfa, verandi með nýfætt barn og á þeim stað að koma upp fjölskyldu og heimili. Ég lít þvert á móti svo á að það sé styrkur. Stjórnmálin eiga að endurspegla samfélagið og þá sem í því búa, fólk á mínum aldri og lífsskeiði á að taka þátt í þeirri vegferð. Ég vil leiða fram jákvæðar breytingar fyrir þann hóp sem tekur við sveitarfélaginu í framtíðinni.
Ég tel mig búa yfir góðri reynslu og skýrri framtíðarsýn sem muni nýtast vel við áframhaldandi uppbyggingu okkar öfluga sveitarfélags. Ég lofa því að ég mun af heilum hug vinna fyrir íbúa Árborgar og samfélagið allt, bera virðingu fyrir sögunni en horfa af framsækni til framtíðar, því þar liggja tækifærin.
Ég leita eftir stuðningi ykkar, kæru íbúar Árborgar.
Matthías Bjarnason
Oddviti B-lista Framsóknar í Árborg