Okkar Hveragerði hefur lagt kapp á að leita leiða til að draga fram þá töfra sem finna má í Hveragerði, til að undirstrika að hér í fallega bænum okkar eru rík tækifæri til samveru og útivistar fyrir allan aldur, bæði í ósnortinni náttúru og á skipulögðum útivistar- og leiksvæðum.
Ævintýrasvæðin sem finna má víða í bænum okkar einkennast að mörgu leyti af skemmtilegum krókum og kimum sem sköpuðust við uppbyggingu hans á árum áður, oft án þess að sérstaklega væri að því hugað. Í æsku margra Hvergerðinga voru þessi svæði vettvangur ýmissa misgáfulegra prakkarastrika og dásamlegra stunda og í þeim felast ákveðnir töfrar og einstök gæði.
Unnið hefur verið að nánari útfærslu á einu slíku ævintýralegu útivistar- og leiksvæði í svokölluðum Leynilundi á milli Dynskóga og Laufskóga, með aðkomu frá Varmahlíð.
Undirritaðar hvetja bæjarbúa til að leggja leið sína á þetta fallega svæði, en fyrirhugað er að hefja uppbyggingu á svæðinu á árinu 2026.
Á kjörtímabilinu hefur jafnframt verið unnið að margvíslegum úrbótum og viðhaldi á þeim útivistar- og leiksvæðum sem fyrir eru í bæjarfélaginu í takt við áherslur á fjölskylduvænt umhverfi. Til að mynda var tímabundnu leiksvæði komið upp í Kambalandi þar til lokið hefur verið við frágang leiksvæðis sem fyrirhugað er á svæðinu til framtíðar ásamt því að unnið er að undirbúningi leiksvæðis í austurhluta Heiðmerkur með sérstakri áherslu á aðgengi fyrir hreyfihamlaða.
Þá hefur verið unnið að úrbótum og uppbyggingu á hundasvæðum bæjarins. Meðal annars hefur nýtt smáhundasvæði litið dagsins ljós innan bæjarmarkanna ásamt leiktækjum.
Á komandi árum bíður Hvergerðinga spennandi verkefni sem felst í nánari útfærslu og uppbyggingu útivistarsvæðis undir Hamrinum – sem er mikið ævintýrasvæði með ríkum tækifærum til útivistar, hreyfingar, tómstundaiðkunar og útináms. Það má með sanni segja að löngu sé orðið tímabært að skapa svæðinu undir Hamrinum umgjörð sem sæmir þessari perlu bæjarfélagsins.
Okkar Hveragerði vill meðal annars leggja áherslu á eftirfarandi þætti í uppbyggingu útivistar- og leiksvæða á komandi árum:
- Byggja upp nýtt útivistar- og leiksvæði í Kambalandi.
- Þróa skógar- og náttúruleiksvæði undir Hamrinum í samstarfi við Skógræktarfélagið.
- Efla og endurnýja leiksvæði um bæinn með áherslu á Leynilund á milli Dynskóga og Bláskóga, útisvæði Bungubrekku og uppbyggingu leiksvæðis við Heiðmörk 66 þar sem sérstök áhersla verður á aðgengismál.
- Fjölga körfuboltavöllum og setja upp hjólabraut (pump track).
- Koma upp viðbótar hoppubelg austan Breiðumerkur.
- Þróa skynjunar- og upplifunargarða sem styðja við andlega heilsu, náttúrulæsi og núvitund íbúa t.d. í Lystigarði og við Varmá.
- Styðja við uppbyggingu framtíðaraðstöðu undir Hamrinum fyrir Skátafélagið Strók.
Okkar Hveragerði hlakkar til áframhaldandi samtals við íbúa um hvernig bæta megi enn frekar fallegu útivistar- og leiksvæðin í fallega bænum okkar.
Dagný Sif Sigurbjörnsdóttir, Sandra Lind Brynjarsdóttir og Brynja Hrafnkelsdóttir.
Höfundar skipa 2., 4. og 6. sæti á lista Okkar Hveragerðis 2026