Á undanförnum árum hefur Verkalýðsfélag Suðurlands sýnt í verki hve öflug réttindagæsla þess er fyrir félagsfólk sitt. Ítrekað hefur komið í ljós að þegar á reynir stendur félagið þétt við bakið á fólki, ekki einungis með ráðgjöf á pappír heldur með raunverulegri aðstoð þegar mest á þarf að halda.
Á síðasta ári lauk félagið meðferð um 60 kjaramála, þar sem kjaramálafulltrúar og formaður félagsins önnuðust hagsmunagæslu félagsfólks. Í mörgum tilvikum leiddi sú vinna til kjaraleiðréttinga eða leiðréttinga á réttindum félagsmanna og samanlagður fjárhagslegur ávinningur þeirra nam á annan tug milljóna króna. Þegar þetta er sett í samhengi við stærð félagsins er árangurinn enn skýrari. Miðað við stærð Verkalýðsfélags Suðurlands jafngildir þetta að félag með 27 þúsund félagsmenn hefði lokið um 900 málum á einu ári og til samanburðar innheimti VR, stærsta stéttarfélag landsins með um 41 þúsund félagsmenn, launakröfur vegna 347 félagsmanna á árinu 2025.
Réttinda- og hagsmunagæsla verkalýðsfélagsins hefur einnig komið skýrt fram í tengslum við gjaldþrot fyrirtækja á svæðinu, en slík mál hafa því miður ekki verið einsdæmi á félagssvæðinu. Á síðasta ári varð fyrirtækið Samverk á Hellu gjaldþrota með þeim afleiðingum að fjöldi félagsmanna missti vinnuna skyndilega. Í kjölfarið brást félagið hratt við, veitti leiðsögn um réttindi og ferla og aðstoðaði fólk við að lýsa kröfum sínum í þrotabúið.
Svipuð staða kom upp árið þar á undan þegar Hótel Hella varð gjaldþrota. Þá var sömuleiðis brugðist við af festu og félagsmönnum veitt aðstoð við að tryggja rétt sinn, hvort sem um var að ræða launakröfur, orlofsgreiðslur eða önnur áunnin réttindi.
Fyrir einstakling sem missir vinnuna skyndilega getur ferlið í kringum gjaldþrot verið bæði flókið og yfirþyrmandi. Að hafa aðila sem þekkir kerfið, getur leiðbeint skref fyrir skref og stutt við fólk í samskiptum við þrotabú og stofnanir, getur ráðið úrslitum um hvort réttindi tapast eða nást fram.
Reynsla síðustu ára sýnir að verkalýðsfélagið er ekki aðeins bakhjarl í orði, heldur virkur þátttakandi í að verja hagsmuni félagsfólks síns þegar áföll dynja yfir. Í ljósi þess að fleiri sambærileg mál hafa komið upp á félagssvæðinu skiptir máli að félagsmenn viti að þeir standa ekki einir, sérstaklega þegar mest á reynir.
Þessi reynsla og þekking á slíkum málum er ástæða þess að A-listinn býður sig fram til áframhaldandi forystu. Við sækjum um traust til að halda áfram að leiða félagið af festu og skýrri sýn: að bregðast strax við þegar á reynir, fylgja málum eftir af krafti og tryggja að enginn félagsmaður standi einn eftir þegar óvissa og áföll verða.
A-listinn stendur fyrir sterka réttindagæslu, aðgengilega þjónustu og ábyrg vinnubrögð í verki, ekki aðeins í orði.
Guðrún Elín Pálsdóttir
Formaður Verkalýðsfélags Suðurlands f.h. A-lista