Fjallkonan í Húsinu

Leturstærð: Decrease font Enlarge font
image

Næstkomandi laugardag kl. 20:00 verður leiksýningin „Fjallkonan“ sýnd í Húsinu á Eyrarbakka.

Sýningin hefur ferðast víða um land og var sýnd í Tjarnarbíó á síðasta leikári en höfundur og leikkona sýningarinnar Hera Fjord fluttist fyrir stuttu til Eyrarbakka.

Fjallkonan er byggð á ævi langalangömmu Heru, veitingakonunnar Kristínar Dahlstedt sem sumir þekkja sem ástkonu ljósvíkingsins sem Laxness gerði frægan í Heimsljósi. 

Kristín fór 18 ára til Danmerkur þar sem hún lærði um matseld og veitingarekstur en kom aftur til Íslands árið 1905 og rak eigin veitinga og gistiheimili í Reykjavík í hálfa öld, oftast undir nafninu Fjallkonan á Laugaveginum. Hún kom fram með margar nýjungar í veitingarekstri og breytti veitingahúsamenningunni eins og við þekkjum hana í dag.

Kristín var mikill frumkvöðull og nútímakona sem gerði hlutina eftir sínu eigin höfði, bæði í atvinnu og einkalífinu.

Hera Fjord er langalangömmubarn Kristínar og hefur kynnt sér sögu hennar vel og segir áhorfendum á litríkan og skemmtilegan hátt frá lífi hennar en veltir á sama tíma fyrir sér eigin lífi og því hverju hún á sameiginlegt með þessari formóður sinni.

Leiksýningin var frumsýnd á Act Alone 2017 þar sem hún fékk mikið lof og athygli. Hún var einnig sýnd í Tjarnarbíói þann 10. september fyrir fullu húsi og fékk hún þriggja stjörnu gagnrýni í Morgunblaðinu.

Takmarkað framboð sæta er á sýningunni en frítt er inn í tilefni af menningarmánuðinum október í Árborg.

  • email Senda frétt
  • print Prentvæn útgáfa
  • Plain text Einfaldur texti