Kóngsvegurinn – leið til frelsis

Ólafur Örn Haraldsson, fyrrverandi þjóðgarðsvörður og forseti Ferðafélags Íslands, segir frá heimsókn Friðriks áttunda konungs sumarið 1907 og framkvæmdinni við Kóngsveginn fimmtudaginn 20. september kl. 20-21 í Hakinu gestastofu á Þingvöllum.

Dagskráin er hluti af viðburðum sem haldnir eru í tilefni af 100 ára fullveldi Íslands og er aðgangur ókeypis.

Kóngsvegurinn er stærsta einstaka framkvæmd Íslendinga. Hann var gerður til að taka á móti Friðrik áttunda konungi sumarið 1907. Föruneyti konungs taldi um 200 manns, ríkisþingmenn og aðstoðarfólk. Leiðin liggur frá Reykjavík um Mosfellssveit til Þingvalla, Laugarvatns, Geysis, Gullfoss um Hrunamannahrepp niður Þjórsárbakka og sem leið liggur um Hellisheiði til Reykjavíkur.

Framkvæmdin var risavaxin jafnt efnahagslega sem félagslega. Framkvæmdin kostaði um 14% af landsframleiðslu sem samsvarar um 350 milljörðum króna í dag. Svo stór framkvæmd reyndi ekki síður á samstöðu Íslendinga við að skipuleggja og framkvæma verkið.

Undirbúningur að heimsókninni, heimsóknin sjálf og þau tengsl sem þar mynduðust urðu síðan nauðsynlegur grunnur að því trausti og tengslum sem stikuðu leiðina til frelsis. Fullveldið 1918 var rökrétt framhald af heimsókninni og að margra mati nauðsynleg forsenda þess.

Fyrri greinSlæmar uppskeruhorfur hjá kartöflubændum í Flóahreppi
Næsta greinHyggjast friðlýsa Gjána