Rokkarinn, gítarleikarinn, rafeindavirkinn, eldsmiðurinn og tenórsöngvarinn Elmar Gilbertsson ætlar að þenja raddböndin og flytja nokkur vel valin lög í Sólheimakirkju laugardaginn 21. júlí kl. 14.
Tónleikarnir eru hluti af Menningarveislu Sólheima og eins og alltaf er ókeypis aðgangur að öllum viðburðum Menningarveislunnar. Elmar hefur sungið víða og túlkað fjölmargar persónur óperubókmenntanna í allnokkrum óperuhúsum og tónlistarsölum víða um heim. Hann er margverðlaunaður söngvari og hlaut bæði Grímuverðlaunin og Íslensku tónlistarverðlaunin 2014 í flokki sígildrar og samtímatónlistar og einnig Íslensku tónlistarverðlaunin fyrir túlkun sína á hlutverki Lenskys í uppfærslu Íslensku óperunnar á Evgení Onegin haustið 2016.
Þetta er í þrettánda skipti sem Menningarveisla Sólheima er haldin. Íbúar Sólheima bjóða gestum að koma í heimsókn og kynnast starfinu og þeim gildum sem Sólheimar standa fyrir og starfað er eftir þ.e. kærleikur, virðing, sköpunargleði og fagmennska. Lagður er metnaður í að sem flestir finni sig á Sólheimum og njóti sín.
Verslun, kaffihús og sýningar verða opin frá klukkan 12:00- 19:30 alla daga í sumar.