Dagana 7. mars, 14. mars og 21. mars efna Rut Ingólfsdóttir fiðluleikari og kirkjukórar Breiðabólstaðarprestakalls og Odda- og Þykkvabæjarkirkna sameiginlega til tónleika í þremur kirkjum í Rangárþingum eystra og ytra.
Rut Ingólfsdóttir, sem hlaut heiðursverðlaun Íslensku tónlistarverðlaunanna á síðasta ári, mun leika Partítu í d-moll fyrir einleiksfiðlu eftir Johann Sebastian Bach. Kirkjukórarnir, rúmlega 40 söngvarar, munu syngja þekkt sálmalög í útsetningu Bach undir stjórn Kristínar Sigfúsdóttur og Guðjóns Halldórs Óskarssonar.
Sálmarnir sem sungnir verða tengjast þessu meistaraverki Bachs fyrir fiðluna Partítu í d-moll, en einn kafli þess er hin þekkta Ciacconna. Sagt er að Bach hafi samið Ciacconnuna í minningu konu sinnar sem dó ung frá mörgum börnum þeirra. Með fiðluleik Rutar syngja einnig Aðalheiður M. Gunnarsdóttir, sópran, Sigríður Aðalsteinsdóttir, alt og Bjarni Guðmundsson, baritón. Allir þátttakendur eru búsettir í Rangárþingum.
Tónleikarnir verða haldnir:
í Oddakirkju á Rangárvöllum 7. mars 2018 kl. 20.00
í Krosskirkju í Landeyjum 14. mars 2018 kl. 20.00
í Hlíðarendakirkju í Fljótshlíð 21. mars 2018 kl. 20.00
Aðgangur er ókeypis en tónleikarnir eru m.a. styrktir af SASS.