Fyrsta bók skáldsins frá Keldnakoti

Loftur Ámundason er öryggisvörður í Kringlunni. Einn góðan veðurdag uppgötvar hann samhengi hlutanna. Hann sér líka hvernig mennirnir sólunda lífinu og hann ákveður að bjarga mannkyninu.

Loftur fær til liðs við sig Kristrúnu lífstílsbloggara, Hauk kerfisfræðing í utanríkisráðuneytinu, Bob Dylan og Jesú Krist. Saman leggja þau á ráðin um björgun heimsins – um byltingu.

Svona hljómar kynningin á bókinni Sauðfjárávarpið, sem er fyrsta bókin sem Hákon Jens Behrens frá Keldnakoti í Stokkseyrarhreppi sendir frá sér. Útgefandi er Ormstunga.

Hákon er fæddur 1973 og starfaði í æsku og á unglingsárum við búskap, byggingarvinnu, fiskvinnslu og sjómennsku og er með fyrsta stigs vélstjórnarréttindi. Að loknu námi við Kvikmyndaskóla Íslands 1999 starfaði hann næsta áratug í sjónvarpi og við kvikmyndagerð, ýmist sem tæknimaður, útsendingarstjóri, framleiðandi eða dagskrárgerðarmaður. Hákon las um tíma heimspeki við Háskóla Íslands. Síðasta hálfa áratug hefur Hákon lagst í flakk um veröld víða og sinnt ritstörfum.

Fyrri greinÞjóðvegi 1 lokað vegna alvarlegs umferðarslyss
Næsta greinTvær konur fluttar á sjúkrahús