Saga Natan og Skáld-Rósu

Leturstærð: Decrease font Enlarge font
image

Bókaútgáfan Sæmundur hefur endurútgefið bók Brynjúlfs Jónssonar frá Minna-Núpi um Natan Ketilsson og Skáld-Rósu.

Sagan er hin yngsta af þeim fjórum sögum sem alþýðufræðimenn 19. aldar rituðu um ævi og aldurtila Natans Ketilssonar á Illugastöðum. Hún er heilstæðust þessara sagna og rituð af miklu listfengi. Hér er dregin upp lifandi mynd af mannlífi í Húnaþingi á 19. öld. 

Höfundur rekur aðdraganda morðbrennunnar á Illugastöðum aðfaranótt 14. mars 1928. Frásögnina byggir höfundur á allt að aldargömlum munnmælum. Er að vonum nokkur munur á þeim sögnum og því sem fram kemur í réttarskjölum eins og Eyrún Ingadóttir sagnfræðingur rekur í eftirmála bókarinnar. 

Aftaka Agnesar og Friðriks á Þrístöpum í Vatnsdalshólum sem sagt er ítarlega frá í bókinni var hin síðasta á Íslandi. Bændur úr gervöllu Húnaþingi voru skikkaðir til að vera þar viðstaddir og allar götur síðan hefur þessi athöfn og sagan þar bakvið verið þjóðinni hugleikin. 

Í sögulok rekur höfundur afdrif þeirra sem eftir lifa og þá einkanlega sögu Skáld-Rósu frá Vatnsenda sem var um tíma ástkona Natans Ketilssonar. 

Bókin kom fyrst út hjá Bókaverslun Sigurðar Kristjánssonar árið 1912 og er nú endurútgefin í upprunalegu formi í harðspjalda bók. Eftirmála skrifar Eyrún Ingadóttir sagnfræðingur. 

  • email Senda frétt
  • print Prentvæn útgáfa
  • Plain text Einfaldur texti