Karlakór Hveragerðis vill gjarnan bæta við sig nýjum félögum. Kórinn er að hefja sitt annað starfsár um þessar mundir.
Framundan er skemmtilegt vetrarstarf og má þar nefna nokkur atriði. Til að mynda kemur karlakór frá Akranesi í heimsókn í október, haldin verða skemmtikvöld og tónleikar í nóvember ásamt góðum (leyni)gestum og jólaglögg og hlaðborð í desember.
Í febrúar er fyrirhugað „kjammakvöld“ síðan æfingabúðir og árshátið kórsins í mars. Vortónleikar í apríl og vorferð í maí og þar fyrir utan verða án efa ýmsar óvæntar uppákomur og skemmtanir í vetur.
Í tilkynningu frá kórnum segir að það hafi bersýnilega komið í ljós á síðasta starfsári þvílíkur mannauður býr í kórnum, miklir gleðimenn og snillingar upp til hópa leika á hljóðfæri henda í rándýrar vísur og fara létt með að hlaða í heimsklassa skemmtiatriði án mikillar fyrirhafnar. Því er hér um skemmtilegan og bráðhollan félagsskap að ræða er bara hressir kætir og bætir.
Komdu í kórinn vinur minn
Þér mun geðjast söngurinn
Léttist mjög og lundin þín
Suðurlandið allt þá hvín
(stundum drekkum brennivín).
Æfingar hefjast miðvikudaginn 20. september klukkan 19:30 og stendur til 21:30. Æfingar fara fram í Vesturási Hverahlíð gengt Hveragerðiskirkju.
Velkomið að mæta bara beint á æfinguna eða senda póst á söngstjóra og eða formann kórsins, orlyguratli@simnet.is eða hp-synir@eldhorn.is.