Fjórða og næstsíðasta jólaupplestrarkvöld Bókakaffisins á Selfossi verður fjörugt. Við sögu koma Jón lærði, íslenskir barnaræningar, göfugar kellíngar, draumar franskra skáldkvenna, húsvitjanir í Suðursveit og fréttakonan Sigríður Hagalín les okkur einkennilegar fréttir af áður óþekktum hörmungum landans.
Samkoman er að Austurvegi 22 á Selfossi næstkomandi fimmtudagskvöld 15. desember og verður húsið opnað klukkan 20 en lestur hefst klukkan 20:30 og stendur í um klukkutíma. Notaleg jólastemning og hið rómaða kakó hússins á tilboði.
Þeir sem lesa þetta kvöld eru fyrrnefnd Sigríður Hagalín sem sendir frá sér skáldsöguna Eyland, Viðar Hreinsson sagnfræðingur sem skrifað hefur um Jón lærða, Óskar Magnússon sem sendir frá sér glæpasöguna Verjandinn, Sváfnir Sveinbjarnarson sem sendir frá sér minningabókina Á meðan straumarnir sungu, Guðrún Ingólfsdóttir sem les úr handritum kvenna af fyrri tíð og síðast en ekki síst Þór Stefánsson ljóðskáld sem kynnir okkur þýdd ljóð franskra skáldkvenna sem koma út í bók hans Frumdrög að draumi.
Allir velkomnir meðan húsrúm leyfir.