Sindri tvíbætti HSK metin sín

Leturstærð: Decrease font Enlarge font
image Sindri og Glódís Edda á Raul Guidobaldi leikvanginum í Rieti. Ljósmynd/Rúnar Hjálmarsson

Sindri Freyr Seim Sigurðsson, Umf. Heklu, náði frábærum árangri á European Festival of Sprint í Rieti á Ítalíu um helgina.

Sindra var boðið til keppni í 80 m hlaupi 15 ára og bætti hann sinn besta árangur bæði í undanrásum og úrslitahlaupinu.

Í undanrásunum í gær hljóp Sindri á 9,74 sekúndum í 0,9 m/s mótvindi og bætti sig um 0,1 sekúndu. Hann bætti svo um betur og hljóp á 9,72 sekúndum í 1,1 m/s mótvindi í úrslitahlaupinu í morgun.

Tími Sindra í undanrásunum er þriðji besti árangur 15 ára drengs á Íslandi frá upphafi og tíminn í úrslitahlaupinu er annar besti árangurinn. Hann varð í 16. sæti á Ítalíu af 25 keppendum.

Með þessum árangri tvíbætti Sindri Freyr HSK metið í 80 m hlaupi í karlaflokki, 20-22 ára flokki, 18-19 ára flokki, 16-17 ára flokki og 15 ára flokki. Hann átti sjálfur fyrra metið í öllum þessum flokkum eftir að hann hljóp á 9,84 sek á Gautaborgarleikunum í sumar.

Ítalska frjálsíþróttasambandið bauð stúlku og dreng frá hverju Evrópulandi á mótið um helgina til vekja athygli á því að EM U18 mun fara fram í Rieti árið 2020. Auk Sindra var Glódísi Eddu Þuríðardóttur, UFA, boðið á mótið. Glódís Edda hljóp á 10,51 sek í 1,0 m/s mótvindi í undanrásunum sem er sjötti besti árangur íslenskrar stúlku frá upphafi. Glódís Edda á nú þegar annan besta árangur á afrekaskrá. Í úrslitahlaupinu hljóp hún svo á 10,64 sek í 0,6 m/s mótvindi og hafnaði í 16. sæti af 25 keppendum sem er mjög góður árangur.


Sindri Freyr á hlaupabrautinni á Ítalíu. Ljósmynd/Af Youtubesíðu Ítalska frjálsíþróttasambandsins

  • email Senda frétt
  • print Prentvæn útgáfa
  • Plain text Einfaldur texti