Mikil umræða var um #metoo byltinguna svokölluðu á héraðsþingi HSK, sem haldið var í Þorlákshöfn á dögunum. Í ræðu Guðríðar Aadnegard, formanns HSK, við setningu héraðsþingsins var henni tíðrætt um #metoo byltingununa.
Þessi mál voru einnig rædd í starfsnefndum héraðsþingsins og voru þrjár tillögur samþykktar á þinginu.
Héraðsþingið skorar á sveitarfélög sambandssvæðisins að skilyrða fjárveitingar til íþróttafélaga sem bjóða upp á starf með börn og ungmennum því að félögin setji sér siðareglur, jafnréttisstefnu, viðbragðsáætlanir og fræði sitt fólk um ofbeldi, kynferðislega áreitni og kynferðisofbeldi. Í greinargerð með áskoruninni segir að mikilvægt sé að félög sýni fram á að farið sé eftir jafnréttisáætlunum og jafnréttislögum í starfi sínu. Séu slíkar reglur nú þegar til staðar hvetur stjórn HSK sveitarfélög til að yfirfara sínar stefnur með þetta í huga.
Einnig var samþykkt tillaga þar sem skorað er á stjórnendur, forsvarsmenn og þjálfara í félögum innan HSK að bregðast við og leggja sitt af mörkum í baráttunni gegn hvers kyns ofbeldi innan félaganna, með því að setja sér siðareglur og gera viðbragðsáætlanir. Mikilvægt sé að HSK leggi línur og sé leiðandi í þessu verkefni og aðstoði félögin eins og kostur er.
Þá var einnig samþykkt tillaga þar sem skorað er á ÍSÍ og UMFÍ að koma á fót fagráði og umboðsmanni iðkenda eða sambærilegu embætti til að hugsa um hag íþróttafólks, þarfir þeirra, réttindi og fleira. Í greinargerð með tillögunni segir að í mörgum minni félögum geti verið vandasamt að taka á málum þar sem nálægð, frændskapur og vinskapur er mikill. Því er nauðsynlegt að hægt sé að fara með svona mál til hlutlausra aðila til skoðunar og úrvinnslu.