Selfoss vann öruggan sigur á botnliði Víkings í Olísdeild karla í handbolta í kvöld, þegar liðin mættust í Víkinni. Lokatölur urðu 25-36.
Selfoss hafði góð tök á leiknum allan tímann en staðan í hálfleik var 12-19. Munurinn var fljótlega orðinn tíu mörk í seinni hálfleiknum og aldrei spurning hvoru megin sigurinn myndi lenda.
Teitur Örn Einarsson var markahæstur Selfyssinga með 10/3 mörk, Einar Sverrisson og Haukur Þrastarson skoruðu báðir 6 mörk og voru sterkir í vörninni en Haukur var með tíu löglegar stöðvanir í sókninni. Hergeir Grímsson skoraði 4, Árni Steinn Steinþórsson, Atli Ævar Ingólfsson og Alexander Egan voru allir með 3 mörk og Sverrir Pálsson skoraði 1 mark og varði fjögur skot í vörninni.
Helgi Hlynsson varði 10 skot í marki Selfoss og var með 35% markvörslu.