Þór Þorlákshöfn hefur samið við Bandaríkjamanninn DJ Balentine um að leika með þeim í Dominos deildinni í körfubolta í vetur.
Karfan.is greinir frá þessu.
Balentine er 24 ára, 191 cm hár bakvörður sem lék síðast fyrir Den Bosch í Hollandi. Þar áður hafði hann verið á mála hjá Pieno Zvaigzdes Pasvalys í Litháen eftir að hann lék fjögur ár með bandaríska 1. deildar háskólaliði Evansville árin 2012-16.
Fyrir er Þór með Jesse Pellot-Rosa sem erlendan leikmann í liði sínu en hann snéri sig á ökkla fyrir mánuði síðan og hefur leikið síðustu þrjá leiki meiddur.
„Hann [Pellot-Rosa] fór í sprautu í gær og er ekki leikfær í dag. Við erum einfaldlega að meta stöðuna á þessu þar sem bati hefur verið lítill. Við erum búnir að semja við nýjan mann í ljósi stöðunnar og hann er væntanlegur á næstu dögum,“ segir Einar Árni Jóhannsson, þjálfari Þórs, á vef Karfan.is.