Selfoss tapaði nokkuð óvænt fyrir botnliði Gróttu í Olísdeild karla í handbolta á útivelli í kvöld. Þetta var fyrsti sigur Gróttu í deildinni í vetur.
Selfyssingar komust aldrei almennilega í gang í sóknarleiknum í kvöld og Grótta hafði frumkvæðið lengst af. Staðan í leikhléi var 12-11.
Grótta jók forskotið í seinni hálfleik og þegar sex mínútur voru eftir var munurinn fjögur mörk, 20-16. Selfyssingar svöruðu þá rækilega fyrir sig og hefðu getað jafnað metin úr síðustu sókn leiksins en Hreiðar Levý Guðmundsson varði síðasta skotið frá Einari Sverrissyni á lokasekúndunum og Grótta sigraði 22-21.
Teitur Örn Einarsson og Haukur Þrastarson voru markahæstir Selfyssinga með 5 mörk, en Teitur skoraði þrjú af vítalínunni. Atli Ævar Ingólfsson og Einar Sverrisson skoruðu 4, Hergeir Grímsson 2 og Sverrir Pálsson 1.
Sölvi Ólafsson kom eterkur inn í markið hjá Selfyssingum síðari hluta leiksins og varði 11 skot, en Helgi Hlynsson varði 3/1.
Selfoss er í 6. sæti deildarinnar með 10 stig að loknum níu leikjum en Grótta er áfram í botnsætinu, nú með tvö stig.