Selfoss vann mikilvægan sigur í erfiðum leik gegn ÍR á útivelli í 1. deild kvenna í knattspyrnu í kvöld. Lokatölur urðu 0-1.
Selfyssingar voru sterkari aðilinn í fyrri hálfleik og gerðu harða hríð að marki ÍR. Ísinn var þó ekki brotinn fyrr en á 40. mínútu þegar Barbára Sól Gísladóttir hirti boltann upp í vítateignum og smellti honum í netið. Þetta reyndist eina mark leiksins.
Seinni hálfleikurinn reyndist Selfyssingum mun erfiðari þar sem allt annað var að sjá til ÍR-inga. Heimakonur áttu fínar sóknir og voru nálægt því að skora undir lokin. Reyndar fengu Selfyssingar líka góð tækifæri til þess að auka forystuna en það tókst ekki og lokatölur urðu 0-1. Sætur sigur.
Selfoss hefur 32 stig í toppsæti deildarinnar en þar á eftir koma Þróttur með 29 stig og HK/Víkingur með 27 stig. Þessi lið eiga leik til góða innbyrðis sem leikinn verður annað kvöld.