„Virkuðum stressaðir í upphafi“

Leturstærð: Decrease font Enlarge font
image Svavar Berg Jóhannsson skoraði mark Selfoss. sunnlenska.is/Guðmundur Karl

Selfoss tapaði 1-2 þegar nýbakað topplið Inkasso-deildarinnar í knattspyrnu, Keflavík, kom í heimsókn á Jáverk-völlinn í kvöld.

„Við virkuðum stressaðir í upphafi því við vit­um að þeir hafa hraða fram á við og gæði í leik­mönn­um. Svo náum við að byggja ofan á það og spila okk­ar leik í fyrri hálfleik, og það var eig­in­lega svipað í seinni hálfleikn­um.  Við fengum hins vegar ekki mörg færi, hlaup­in voru ágæt en við náum ekki að renna bolt­an­um inn í svæðið,“ sagði Gunn­ar Borgþórsson, þjálfari Selfoss, í samtali við sunnlenska.is eftir leik.

Gestirnir byrjuðu af miklum krafti gegn óstyrkri vörn Selfossliðsins og Jeppe Hansen kom þeim yfir strax á 3. mínútu. Keflvíkingar hefðu getað bætt við fleiri mörkum á upphafskaflanum en Selfyssingar stóðu af sér storminn og komu sér inn í leikinn.

Síðustu 25 mínúturnar í fyrri hálfleik voru Selfyssingar betra liðið á vellinum en náðu ekki að skapa sér færi gegn sterkri vörn Keflvíkinga.

Staðan var 0-1 í hálfleik en Keflvíkingar tvöfölduðu forskotið strax á 52. mínútu þegar Marc McAusland skallaði aukaspyrnu, sem aldrei hefði átt að vera dæmd, í netið. Dýrt fyrir Selfyssinga að ná ekki að verjast betur.

Tíu mínútum síðar minnkaði Svavar Berg Jóhannsson muninn með skoti af stuttu færi. Keflvíkingar fengu tvö góð færi í kjölfarið en Guðjón Orri Sigurjónsson varði allt sem að marki Selfoss kom.

Selfoss sótti og sótti og fengu sitt besta færi til að jafna í uppbótartímanum þegar Ingi Rafn Ingibergsson skaut framhjá af stuttu færi eftir langt innkast.

Keflavík tyllti sér á toppinn með sigrinum en Selfoss situr í 7. sætinu með 21 stig, tíu stigum á eftir toppliðinu.

  • email Senda frétt
  • print Prentvæn útgáfa
  • Plain text Einfaldur texti