Síðasta umferð Íslandsmótsins í torfæru verður haldin á morgun, sunnudag, en það er Torfæruklúbbur Suðurlands sem stendur að keppninni sem fer fram í gryfjum við Fellsenda í Akrafjalli við Akranes.
Margar hendur koma að undirbúningi slíkrar keppni en athygli vekur að Torfæruklúbbur Suðurlands er eina aðildarfélag Akstursambands Íslands með konu í formennsku, Helgu Katrínu Stefánsdóttur. Helga Katrín er torfæruáhugamönnum alls ekki ókunn en hún hefur komið að keppnishaldi með einum eða öðrum hætti síðustu tíu árin. Hún hefur verið formaður félagsins síðan 2013.
Í frétt á vef Akstursíþróttasambands Íslands segist Helga Katrín hafa gaman að keppnishaldinu og undirbúningi þess en hún hefur einnig tekið þátt í undibúningi keppnisferða erlendis. Helga Katrín einskorðar sig þó ekki eingöngu við Torfæruklúbbs Suðurlands heldur hefur hún verið afar liðleg að aðstoða aðra klúbba, m.a. verið undanfari og dómnefndarmaður í rallýkeppnum.
Algengt er að virkir einstaklingar í mótorsporti heilli vini og fjölskyldumeðlimi til þátttöku en Helga Katrín plataði systur sína, Elvu Stefánsdóttur, til að vinna við eina keppni í Vestmannaeyjum fyrir fjórum árum síðan. Skemmst er frá því að segja að Elva heillaðist af sportinu og því frábæra fólki sem því tengist. Síðan þá hefur hún setið í stjórn Torfæruklúbbs Suðurlands, verið hluti af keppnisliði Kötlu, tekið þátt í undirbúningi Bandaríkjaferðarinnar í fyrra og skrifað fréttir og greinar um torfæruna.
Nú um helgina er þó langþráður draumur Elvu að rætast því eftir mikið suð og sannfærandi tiltal tókst henni að sannfæra Guðbjörn Grímsson um að hún sé fullfær um að stríða strákunum í brekkunum. Hún mun því keppa á Kötlu, full eftirvæntingar og verður án efa spennandi að fylgjast með henni.
Keppnin er síðasta umferð Íslandsmótsins í torfæru og hefst kl. 11:00.