Elvar Örn framlengir við Selfoss

Leturstærð: Decrease font Enlarge font
image Elvar Örn Jónsson spilar áfram fyrir Selfoss. Ljósmynd/UMFS

Leikstjórnandinn Elvar Örn Jónsson hefur framlengt samning sinn við handknattleiksdeild Selfoss til tveggja ára. Elvar Örn er 19 ára gamall og var valinn miðjumaður ársins í Olísdeildinni á síðasta keppnistímabili.

Hann er fastamaður í U-21 landsliði Íslands sem hefur leik á HM í Alsír næstkomandi þriðjudag og hefur að auki verið valinn til æfinga með A-landsliði Íslands.

Elvar Örn var burðarás í liði Selfoss á síðasta keppnistímabili sem náði 5. sæti í deild þeirra bestu eftir að hafa komið upp úr næst efstu deild að loknu fræknu einvígi við Fjölni á vordögum síðasta ár.

Í tilkynningu frá stjórn handknattleiksdeildarinnar kemur fram að það sé mikið fagnaðarefni fyrir handboltann á Selfossi að Elvar hafi kosið að spila áfram fyrir sitt uppeldisfélag og væntir félagið mikils af honum sem og öllum þeim uppöldu Selfyssingum sem ákveðið hafa að halda tryggð við sitt heimafélag.

  • email Senda frétt
  • print Prentvæn útgáfa
  • Plain text Einfaldur texti