Fjallahjólakeppni um Njáluslóðir

Fjallahjólakeppnin Rangárþing Ultra verður haldin þann 22. júlí næstkomandi. Keppnin er sprottin upp úr götuhjólreiðakeppninni Tour de Hvolsvöllur.

Nú hafa Rangárþingin tvö, eystra og ytra, tekið höndum saman um stórskemmtilega keppni á fjallahjólum.

Hjóluð verður 50 km leið, lagt af stað frá Hellu og komið í mark á Hvolsvelli. Leiðin liggur gegnum Njáluslóðir og náttúrufegurðin er gríðarleg.

Eftir að komið er í mark verður hægt að njóta þess að hvíla lúin bein og svamla í sundlauginni á Hvolsvelli og Sláturfélag Suðurlands býður keppendum og fylgifiskum upp á súpu og hinar sívinsælu SS pylsur við íþróttamiðstöðina.

Líta má á þessa keppni sem góða áskorun fyrir alla og hvetja mótshaldarar heimamenn sérstaklega til að nýta tækifærið og reyna sig við þessa hjólaleið.

Búið er að setja upp heimasíðu fyrir keppnina og þar má finna allar upplýsingar ásamt skráningu.

Fyrri greinLýðheilsugöngur á Suðurlandi í september
Næsta greinStrandaglópar á hólma í Skaftá