Landsliðskonan Perla Ruth Albertsdóttir hefur endurnýjað samning sinn við handknattleiksdeild Selfoss en hún var einn af sterkustu leikmönnum Olís-deildar kvenna á síðasta tímabili.
Perla Ruth hefur ekki æft handbolta lengi en hún hefur vakið mikla athygli í deild þeirra bestu fyrir gríðarlegt keppnisskap sem og ótrúlega hæfileika á vellinum.
Hún var á dögunum valin í æfingabúðir A-landsliðsins og mun á mánudaginn hitta stöllur sínar í landsliðinu. Íslenska liðið hefur þá undirbúning fyrir æfingaferð sem farin verður til Danmerkur í júlí sem og fyrir undankeppni EM sem fram fer í Frakklandi.
Í tilkynningu frá handknattleiksdeild Selfoss er því fagnað að Perla skuli sýna félagi sínu tryggð og vera tilbúin að berjast undir merkjum Selfoss hér eftir sem áður en með hana innanborðs eru félaginu flestir vegir færir.