Kvennalið Selfoss vann góðan útisigur á FH í Olís-deild kvenna í handbolta í kvöld. Lokatölur urðu 25-27.
Selfyssingar voru sterkari í fyrri hálfleik og leiddu í leikhléi, 9-14. FH byrjaði hins vegar miklu betur í seinni hálfleik og náði að jafna, 15-15.
Eftir það náðu Selfyssingar frumkvæðinu aftur og náðu tveggja marka forystu. Þrátt fyrir að FH andaði niður um hálsmálið á Selfyssingum allan seinni hálfleikinn þá náðu Selfyssingar að sigla nokkuð öruggum sigri í höfn, 25-27.
Hrafnhildur Hanna Þrastardóttir og Adina Ghidoarca voru markahæstar Selfyssinga, báðar með 8 mörk. Perla Ruth Albertsdóttir skoraði 4.
Selfoss er áfram í 7. sæti deildarinnar, nú með 16 stig, jafnmörg stig og Stjarnan, sem á leik til góða.