Sunnlendingar hrepptu Perlubikarinn

Leturstærð: Decrease font Enlarge font
image Anný hampar Perlubikarnum ásamt Svanhildi Ólafsdóttur frá Krabbameinsfélagi Árnessýslu og þeim Huldu Hjálmarsdóttur (t.h.) og Kristínu Erlu Þráinsdóttur frá Krafti. sunnlenska.is/Guðmundur Karl

Héraðssambandið Skarphéðinn sigraði í keppninni um Perlubikarinn sem Kraftur stóð fyrir í sumar. Þar voru íþróttafélög, sveitar- og bæjarfélög hvött til að etja kappi í perlun armbanda í þágu Krafts.

HSK hafði vinninginn en Sunnlendingar perluðu 2.308 armbönd á fjórum tímum í Sunnulækjarskóla þann 20. júní síðastliðinn. Í öðru sæti urðu Akureyringar, sem perluðu 2.302 armbönd og íþróttafélagið Breiðablik varð í þriðja sæti.

„Það er einstaklega gaman að taka þátt í verkefni sem þessu og eflir þetta bæði keppnisskapið í okkur öllum sem og samhuginn. Að taka þátt í góðgerðarverkefni og keppa í leiðinni er alls ekki leiðinlegt fyrir íþróttafélög eins og okkur“, sagði Anný Ingimarsdóttir. ritari HSK, þegar hún tók við bikarnum í gær. Bikarinn er glæsileg hönnun Selfyssingsins Móeiðar Helgadóttur, forstöðumanns leikmunadeildar Borgarleikhússins.

Yfir 18.000 armbönd voru perluð í Perlubikarnum og eru þau öll seld til styrktar Krafti, stuðningsfélagi ungs fólk sem greinst hefur með krabbamein og rennur allur ágóði armbandanna til Krafts. Hulda Hjálmarsdóttir, framkvæmdastjóri Krafts, er að vonum ánægð með árangurinn.

„Við óskum Sunnlendingum og HSK innilega til hamingju með sigurinn í Perlubikarnum. Það er alveg hreint ómetanlegt hvað allir voru tilbúnir að taka þátt í þessari keppni með okkur og dásamlegt að upplifa hversu margir lögðu hönd á perlu“, sagði Hulda þegar hún afhenti Anný bikarinn sem er að sjálfsögðu perlaður.

„Hver veit nema við skellum í Perlubikarinn 2019 næsta sumar þar sem Sunnlendingar þurfa ef til vill að verja titilinn gagnvart nýjum eða reyndum keppendum og við gerum Perlubikarinn að farandbikar í leiðinni,“ bætti Hulda við í lokin.

  • email Senda frétt
  • print Prentvæn útgáfa
  • Plain text Einfaldur texti