Liður í forvörnum gegn heimilisofbeldi

Lögreglustjórinn í Vestmannaeyjum og Lögreglustjórinn á Suðurlandi hafa í sameiningu látið gefa út upplýsingabækling um hvert fólk geti leitað búi það við ofbeldi.

Bæklingurinn ber heitið „Býrð þú við ofbeldi“ og er texti hans á íslensku, ensku og pólsku.

Útgáfan er liður í forvarnarstarfi lögreglunnar gegn heimilisofbeldi og veitir mikilvægar upplýsingar um hver einkenni ofbeldis eru, þau alvarlegu áhrif sem það hefur á börn að búa við ofbeldi auk þess sem tilkynningaskylda til barnaverndar er áréttuð og neyðarnúmerið 112.

Samband Sunnlenskra Sveitarfélaga, SASS, styrkti útgáfuna með því að greiða fyrir prentun og er það von þeirra sem að átakinu standa að framhald verði á samstarfi þessara aðila. Í fréttatilkynningu um útgáfu bæklingsins er Rúnari Þór Steingrímssyni, rannsóknarlögreglumanni, þakkað frumkvæði í málinu.

Á meðfylgjandi mynd eru Kjartan Þorkelsson, lögreglustjóri á Suðurlandi, Páley Borgþórsdóttir, lögreglustjóri í Vestmannaeyjum, Eva Björk Harðardóttir, formaður SASS og Bjarni Guðmundsson, framkvæmdastjóri SASS.

Fyrri greinÓlöf ráðin deildarstjóri á Ljósheimum og Fossheimum
Næsta greinFyrstu leiguíbúðir SS komnar í notkun