Lokun Ölfusárbrúar flýtt

Í nótt hefjast framkvæmdir við Ölfusárbrú en til stendur að steypa nýtt brúargólf annað kvöld.

Brúnni verður lokað á miðnætti í kvöld en opnuð aftur kl. 6:00 í fyrramálið.

Þar sem rigningarský eru að færa sig upp á skaftið og koma fyrr að landi en upphaflega var gert ráð fyrir þarf að flýta lokun brúarinnar á morgun mánudag og verður henni því lokað kl. 16 í stað kl. 20.

Brúin verður svo lokuð í allt að viku þar sem steypan er nokkra sólarhringa að harðna. Áætlað er að hægt verði að hleypa aftur umferð á brúna þann 20. ágúst en það gæti þó orðið fyrr ef aðstæður eru góðar.

Á meðan verður umferð beint um Þrengsli og Óseyrarbrú annars vegar, og uppsveitir Árnessýslu hins vegar.

Gangandi vegfarendur munu komast um Ölfusárbrú á meðan á framkvæmdunum stendur þar sem gangbrautin yfir brúnna verður opin á framkvæmdatímanum.

Fyrri grein„Erum með áfast bros allan daginn“
Næsta greinÖndverðarnes og Hvergerðingar upp um deild