Á fundi bæjarstjórnar Ölfuss í dag var gengið frá ráðningu Elliða Vignissonar í starf bæjarstjóra Sveitarfélagsins Ölfuss.
Elliði er 49 ára gamall og hefur undanfarin tólf ár starfað sem bæjarstjóri í Vestmannaeyjum. Auk þess sat Elliði í bæjarstjórn Vestmannaeyja og ýmsum nefndum og ráðum hjá Vestmannaeyjabæ frá árinu 2003. Áður starfaði Elliði m.a. við kennslu og sálfræðistörf auk þess að sitja í stjórnum fyrirtækja og stofnana.
Elliði lauk MA prófi í sálfræði frá University of Copenhagen árið 1998 auk kennslufræði til kennsluréttinda frá HÍ árið 1996. Auk þess hefur Elliði lagt stund á nám í opinberri stjórnsýslu við HÍ.
Elliði er kvæntur Berthu I. Johansen íslenskufræðingi og framhaldsskólakennara og saman eiga þau tvö börn, Nökkva Dan atvinnumann í handbolta og Bjarteyju Bríeti framhaldsskólanema.
Elliði hefur störf þann 9. ágúst næstkomandi.