Mikið tjón varð þegar eldur kom upp í fiskeldishúsi í landi Núpa í Ölfusi í nótt. Neyðarlínan fékk tilkynningu um eldinn frá vegfaranda um klukkan hálf eitt í nótt.
Enginn var í húsinu þegar eldurinn kom upp, en talsverður eldur var í húsinu þegar slökkviliðsmenn frá Hveragerði, Þorlákshöfn og Selfossi mættu á vettvang.
Slökkvistarf gekk vel en því lauk um klukkan hálfþrjú í nótt. Lögregluvakt var við húsið fram undir morgun þegar vettvangsrannsókn hófst.
UPPFÆRT KL. 12:01: Lögregla hefur nú lokið vinnu á vettvangi. Eldsupptökin voru í eða við rafmótor við fóðurgjafabúnað. Hluti þess búnaðar var haldlagður til frekari rannsóknar hjá sérfræðingi Mannvirkjastofnunar.