Á níunda tímanum í kvöld voru björgunarsveitir á Suðurlandi kallaðar út í þriðja skipti í dag. Þá hafði björgunarsveitarfólk rétt náð að klára kvöldmatinn eftir útköll dagsins.
Rétt fyrir klukkan tíu í kvöld voru um 30 manns komnir upp á Fimmvörðuháls á bílum, vélsleðum og sexhjólum að leita að örmagna göngumanni.
Hann heldur kyrru fyrir við ákveðna stiku og er talið líklegt að hann verði fundinn fljótlega. Á hálsinum er snjókoma og strekkingur og nokkuð magn af nýföllnum snjó.
Þetta er þriðja útkall dagsins en það fyrsta kom klukkan 4:07 í nótt einnig á Fimmvörðuhálsi, klukkan 14:33 kom annað útkall en þá var ferðamaður villtur og þrekaður milli Hvanngils og Emstra. Í öllum tilvikunum náðu viðkomandi að hringja sjálf eftir aðstoð.
Í tilkynningu frá Landsbjörgu segir að mikilvægt sé að fólk sem hugar að ferðalögum á hálendi landsins fylgist með verðurspá og kynni sér aðstæður, þó nokkuð er enn af snjó á hálendinu sem getur torveldað ferðalög.
Á vefnum www.safetravel.is er hægt að kynna sér góða ferðahegðun ásamt því að skila inn ferðaáætlun sem er mikilvægur öryggisþáttur í ferðalögum.